वैध मद्यविक्रेत्यास अवैधवाल्याची मारपीट

चिखली येथील राजेंद्र चंद्रकांत आवटे हे परवानाधारक मद्यविक्रेते आहेत. त्यांनी काही दिवसांपूर्वी उस्मानाबाद तालुक्यात ढाब्यांवरुन सुरु असलेल्या अवैध मद्यविक्रीवर कारवाई करावी, अशी तक्रार केली होती. या तक्रारीचा राग मनात धरुन गुरुवारी चिखली येथीलच ढाबाचालक रमण नवनाथ ढवळे व अन्य दोघांनी चिखली चौकात आवटे यांना गाठले. तक्रारी करतो का, असे विचारत काठीने डोक्यात मारहाण केली. इतर दोघांनीही शिवीगाळ करीत मारहाण केली. या प्रकारानंतर बेंबळी पोलिसांत तक्रार करण्यासाठी कारने जात असताना तिन्ही आरोपींनी आवटे यांना पुन्हा रस्त्यातच अडवले. येथे त्यांनी कारच्या काचेची तोडफोड करुन आमच्या नादाला लागल्यास तर बघून घेऊ, अशी धमकी दिली. याबाबतची तक्रार आवटे यांनी बेंबळी पोलिसांत केली असून, त्यानुसार गुरुवारी रात्री गुन्हा दाखल करण्यात आला.