अभिज्ञा भावे (Abhidnya Bhave) ही मराठी टीव्ही इंडस्ट्रीतील एक गुणी अभिनेत्री. अभिज्ञाला पुन्हा एकदा छोट्या पडद्यावर पाहण्यास उत्सुक असाल तर ही बातमी तुमच्यासाठी आहे. होय, अभिज्ञा एका नव्या मालिकेत महत्त्वपूर्ण भूमिकेतून तुमच्या आमच्या भेटीला येतेय. खुद्द तिनेच एक व्हिडिओ पोस्ट करत तिच्या या नव्या प्रोजेक्टची माहिती दिली आहे. ‘तू तेव्हा तशी’ (Tu Tevha Tashi) या नव्या मालिकेत अभिज्ञा दिसणार आहे. ‘मी तुम्हाला पुन्हा भेटायला येत आहे. एका अशा भूमिकेत जी मला याआधी करायला मिळाली नाही. याही वेळी तुमचं प्रेम मला मिळेल, अशी आशा करते. कारण विश्वास ठेवा, माझी मेहनत 100 पटीने जास्त असणार आहे,’ असं कॅप्शन देत अभिज्ञाने मालिकेचा प्रोमो शेअर केला आहे.
‘तू तेव्हा तशी’ या मालिकेची आधीच चर्चा आहे. बऱ्याच वर्षांनी लोकप्रिय अभिनेता स्वप्निल जोशी (Swwapnil Joshi) या मालिकेत दिसणार आहे. त्याच्यासोबत शिल्पा तुळसकरही (Shilpa Tulaskar) आहे. म्हणजेच, एक फ्रेश जोडी म्हणून प्रेक्षकांच्या भेटीला येत आहेत. नुकताच स्वप्निलने मालिकेचा पहिला प्रोमो शेअर केला होता. ज्यात स्वप्निल आणि शिल्पाचा लुक दाखवण्यात आला होता. आता या मालिकेत अभिज्ञा भावे देखील दिसणार आहे.
अभिज्ञा या मालिकेत कोणत्या भूमिकेत आहे, हे अद्याप गुलदस्त्यात आहे. तिची भूमिका नेमकी सकारात्मक असणार की नकारात्मक याबद्दल कोणतीच माहिती समोर आलेली नाही. मात्र अभिज्ञा भावेला नवीन भूमिकेत पाहण्यासाठी प्रेक्षक मात्र उत्सुक आहेत. येत्या 30 मार्चपासून रात्री 8 वाजता ‘तू तेव्हा तशी’ ही नवी मालिका झी मराठीवर तुम्ही पाहू शकणार आहात. अभिनेत्री अभिज्ञा भावे ‘खुलता कळी खुलेना’ आणि ‘तुला पाहते रे’ या मालिकांमधून घराघरांत पोहोचली. मालिकां आणि तिच्या ग्लॅमरस लुकमुळे अभिज्ञा नेहमीच चर्चेत असते. मेहूल पै याच्यासोबत अभिज्ञा लग्नबंधनात अडकली आहे.