‘तुझ्यात जीव रंगला’ या मालिकेतील राणादा व पाठकबाई अर्थात अभिनेता हार्दिक जोशी ( Hardeek Joshi ) व अक्षया देवधर (Akshaya Deodhar ) हे दोघे एकमेकांच्या प्रेमात आकंठ बुडाले आहेत. काही महिन्यांपूर्वी साखरपुड्याचे फोटो शेअर करत या दोघांनी चाहत्यांना सुखद धक्का दिला होता. त्यांच्या साखरपुड्याचे फोटो पाहून त्यांच्या चाहत्यांना आनंद तर झाला होता पण आश्चर्याचा धक्कादेखील बसला होता. आता ते लवकरच दोघे लग्नबेडीत अडकणार आहेत. ते सोशल मीडियावर बऱ्याचदा व्हिडीओ आणि फोटो शेअर करत असतात. दरम्यान अक्षयाने इंस्टाग्रामवर शेअर केलेल्या व्हिडीओने सर्वांचे लक्ष वेधून घेतले आहे.
अक्षया देवधरने इंस्टाग्रामवर एक व्हिडीओ शेअर केला आहे. हा व्हिडीओ शेअर करत तिने लिहिले की, टी २० वर्ल्ड कपचे अँथम साँग रिलीज झाले आहे आणि ते खूप छान आहे. या व्हिडीओत अक्षया आणि हार्दिक भरगर्दीत गणेशोत्सव मंडळाच्या गणपती विसर्जनात चेहऱ्यावर मास्क लावून नाचताना दिसत आहेत. त्यांच्या या व्हिडीओला चाहत्यांची खूप पसंती मिळताना दिसत आहेत. ते दोघांच्या डान्सची प्रशंसा करत आहेत.
अक्षया देवधर आणि हार्दिक जोशी यांच्या लग्नाची सध्या जोरदार तयारी सुरू आहे. त्यांच्या केळवणाचे फोटोदेखील सोशल मीडियावर पाहायला मिळतात. तसेच नुकतेच पुण्यात साडी विणणाऱ्या एका नामांकित कंपनीत अक्षयाच्या लग्नाची साडी विणायला घेतली गेली. या विधीला वधू-वरांकडील निवडक मंडळी उपस्थित होते. त्यांचे लग्न पुण्यात होणार आहे. परंतु लग्नाची तारीख मात्र अद्याप गुलदस्त्यात आहे.