भूमी पेडणेकरने दम लगा के हैशा या चित्रपटापासून तिच्या कारकिर्दीला सुरुवात केली. तिला तिच्या पहिल्याच चित्रपटासाठी पुरस्कार मिळाले. ती लंबे रेस का घोडा असल्याचे तिने पहिल्याच चित्रपटाद्वारे दाखवून दिले होते. आजवर तिने टॉयलेट एक प्रेम कथा, शुभ मंगल सावधान यांसारखे अनेक हिट चित्रपट दिले आहेत. भूमीचा पहिला चित्रपट २७ फेब्रुवारी २०१५ ला प्रदर्शित झाला होता. म्हणजेच भूमीला बॉलिवूडमध्ये पदार्पण करून आता चार वर्षं पूर्ण होणार आहेत. या चार वर्षांत भूमीने बॉलिवूडमध्ये आपले एक स्थान निर्माण केले आहे. या वर्षांत तर तिचे पाच चित्रपट प्रदर्शित होणार आहेत. सोनचिडिया हा तिचा चित्रपट लवकरच प्रेक्षकांच्या भेटीस येणार आहे.
भूमी आता करण जोहरच्यातख्त या चित्रपटात झळकणार आहे. या चित्रपटाविषयी ती सांगते, या चित्रपटातील माझ्या भूमिकेविषयी जास्त काही मी सांगू शकत नाही. पण हे मी नक्कीच सांगेन की, आजवरच्या सगळ्या भूमिकांपेक्षा ही भूमिका वेगळी असून मी एका मॉर्डन अवतारात प्रेक्षकांना पाहायला मिळणार आहे. आजवरच्या माझ्या सगळ्या चित्रपटांमध्ये मी कधीच अतिशय श्रीमंत मुलीची भूमिका साकारलेली नाहीये. पण करणने मला या चित्रपटात खूपच श्रीमंत दाखवले आहे. त्यामुळे एक वेगळी भूमी या चित्रपटाद्वारे प्रेक्षकांच्या भेटीस येणार आहे.