‘शिव्या’साठी तयार भूषण-संस्कृती

भू षण प्रधान आणि संस्कृती बालगुडे या जोडीने मालिका आणि चित्रपटांमध्ये एकत्र काम करून प्रेक्षकांची मने नेहमीच जिंकली आहेत. मोठ्या पडद्यावरील या दोघांची अफलातून केमिस्ट्री त्यांच्या चाहत्यांना नक्कीच पाहायला आवडते. लवकरच आपल्याला ही जोडी रुपेरी पडद्यावर दिसणार आहे. एका आगामी मराठी चित्रपटात या दोघांचे ट्यूनिंग पाहण्याची संधी प्रेक्षकांना मिळणार आहे. याच चित्रपटाचे नाव आहे ‘शिव्या’. सिनेमाला एकदम हटके नावे देण्याचा सध्या ट्रेंड आहे. अगदी सहज आपण बोली भाषेत वापरतो तशा शब्दांची नावे आता चित्रपटाला देण्यात येऊ लागली आहेत. तसाच एकदम भन्नाट विषय घेतलेला ‘शिव्या’ हा चित्रपटदेखील लवकरच प्रेक्षकांच्या भेटीला येणार आहे. आता चित्रपटाच्या नावावरूनच या चित्रपटात नक्की काय असणार याची उत्सुकता प्रेक्षकांना लागणे स्वाभविकच आहे. या चित्रपटाचे कथानक हे तरुणाईच्या भोवती फिरत असल्याचे समजतेय. या चित्रपटामध्ये आपल्याला पीयूष रानडे, विद्याधर जोशी, शुभांगी लाटकर हे कलाकार दिसणार आहेत. सध्याच्या तरुणाईच्या लाईफस्टाईलवर या चित्रपटात प्रकाश टाकण्यात आला आहे. संस्कृती आणि भूषणची जोडी आता या चित्रपटात कशी दिसतेय आणि ती प्रेक्षकांच्या पसंतीस पुन्हा एकदा उतरतेय का हे पाहणे औत्सुक्याचे ठरणार आहे.