‘बिग बॉस 16’ (Bigg Boss 16) सध्या जाम चर्चेत आहे. रोज नवे वाद, रोज बदलणारी नाती, रोज नवा मुद्दा यामुळे या शोची चर्चा जोरात आहे. गेल्या एपिसोडमध्ये घरात जणू महायुद्ध झालं. होय, भांडण तसं साजिद खान (Sajid Khan ) व गोरी नागोरी यांच्यात सुरू झालं होतं. पण शिव ठाकरेनं ( Shiv Thakare ) अचानक या वादात उडी घेतली आणि मग अर्चनाही गोरीच्या बाजूने मैदानात उतरली. या भांडणात शिव अर्चनाच्या इतक्या जवळ आला की, अर्चनाने शिवचा गळा पकडला. मग काय, शिवचे सर्व मित्र निम्रत कौर अहलुवालिया, सुम्बुल तौकीर खान, शालीन भनोट असे सगळे एकवटले आणि त्यांनी अर्चनाला बाहेर काढा म्हणून ठिय्या मांडला. हे सगळं बघितल्यानंतर लोकांनी शिवची बाजू घेण्याऐवजी त्याच्यावर भडास काढली. होय, शिव साजिद खानच्या हातचं बाहुलं बनला आहे, असं म्हणत सोशल मीडिया युजर्सनी शिवला फैलावर घेतलं.
शिव साजिदच्या मागे सर...सर...म्हणून फिरत असतो. साजिदच्या चुका त्याला दिसत नाहीत का? अशा कमेंट करत नेटकऱ्यांनी शिववर निशाणा साधला. साजिदच्या नादाला लागून शिव आपला गेम खराब करतोय, असं निरीक्षणही बिग बॉसच्या चाहत्यांनी नोंदवलं. अनेकांनी तर अगदी मांड ठोकून शिव जिंकणारा नाही, अशा आशयाच्या कमेंट्स केल्या.
शिव ठाकरे हा ‘बिग बॉस मराठी 2’चा विजेता होता. ‘बिग बॉस 16’मध्ये शिव पहिल्या दिवसापासून चांगला खेळताना दिसला. अगदी सलमाननेही त्याचं कौतुक केलं होतं. ‘बिग बॉस मराठी’ करण्यापूर्वी शिवने एमटीव्ही रोडीजमध्ये सहभाग घेतला होता.