Bigg Boss Marathi Season 5 : बिग बॉस मराठीचा नवा सीझन सुरू होऊन तीन आठवडे झाले आहेत. दिवसेंदिवस हा खेळ अधिक रंजक होत चालला असून घरातील सदस्यांची समीकरणंही बदलत असल्याचं पाहायला मिळत आहेत. बिग बॉस मराठीच्या घरात पहिल्या दिवसापासूनच निक्की आणि अरबाजमध्ये चांगली मैत्री झाल्याचं पाहायला मिळत होतं. पण, आता मात्र त्यांच्यात खटके उडाल्याचं दिसत आहे.
बिग बॉस मराठीच्या घरातील एक नवा व्हिडिओ समोर आला आहे. यामध्ये निक्की अभिजीतशी बोलल्याने अरबाजला राग अनावर झाल्याचं पाहायला मिळत आहे. अरबाज निक्कीबरोबर बोलताना जोरजोरात ओरडत असल्याचंही व्हिडिओत दिसत आहे. बिग बॉसच्या घरात निक्कीशी केलेलं हे वर्तन मराठी अभिनेता आणि बिग बॉस मराठीचा स्पर्धक राहिलेल्या पुष्कर जोगला मात्र रुचलेलं नाही. याबाबत त्याने सोशल मीडियावर पोस्ट शेअर करत अरबाजला फटकारलं आहे.
"बायकांवर हडतूड करणारे, त्यांच्यावर केकाटणारे मर्द पुरुष ह्यांचा मी निषेध करतो... आपल्या सोसायटीमध्ये हे नॉर्मल आहे असा समज आहे. पण तेच सर्वात घातक आहे... प्रत्येक स्त्री आपल्या आई आणि बहिणीसारखी आहे. प्रिय स्पर्धक, हा शो ग्रेट आहे आणि तो तसाच ठेवा", असं पुष्करने त्याच्या इन्स्टाग्राम पोस्टमध्ये म्हटलं आहे.
दरम्यान, योगिता चव्हाण आणि निखिल दामले यांचा बिग बॉस मराठीच्या घरातील प्रवास संपला आहे. या आठवड्यात घराचा कॅप्टन झाल्यामुळे अरबाज पटेल सेफ असेल. त्यामुळे आता कोणत्या सदस्यांवर एलिमिनेशनची टांगती तलवार असेल, हे पाहावं लागेल.