कर्नाटकच्या राजकीय नाट्यावरून ‘ही’ अभिनेत्री गुगलवर होतेय सर्वाधिक सर्च; पण का?

कर्नाटकात सुरू असलेल्या राजकीय नाट्यादरम्यान जेडीएसचे नेते अन् मुख्यमंत्रिपदाचे दावेदार एच.डी. कुमारस्वामी यांची पत्नी राधिका कुमारस्वामीला गुगलवर मोठ्या प्रमाणात सर्च केले जात आहे. राधिका तिच्या सुंदरतेमुळे ट्रेंड होत आहे. जेडीएस नेता आणि कर्नाटकचे भावी मुख्यमंत्री म्हणून लवकरच शपथ घेणारे कुमारस्वामी यांची पत्नी राधिका कुमारस्वामी कन्नड चित्रपटांमधील प्रसिद्ध अभिनेत्री आणि प्रोड्युसर आहे. राधिकाने २००२ मध्ये ‘नीला मेघा शमा’ या कन्नड चित्रपटातून अभिनयाला सुरुवात केली. आपल्या पहिल्या चित्रपटाच्या डेब्यूप्रसंगी राधिका इयत्ता नववीत होती. वास्तविक तिचा पहिला चित्रपट ‘नीनागागी’ आहे. ज्यामध्ये ती विजय राघवेद्रच्या अपोझिट बघावयास मिळाली होती. राधिका तिच्या चित्रपटांपेक्षा नातेसंबंधांमुळेच अधिक चर्चेत राहिली आहे. मीडिया रिपोर्ट्सनी केलेल्या दाव्यानुसार, २००० साली राधिकाने रतनकुमारसोबत मंदिरात लपून-छपून लग्न केले होते. त्यानंतर २००२ मध्ये रतनकुमारने राधिकाच्या वडिलांविरोधात पोलिसांत तिला पळवून घेऊन गेल्याची तक्रार दिली होती. रतनकुमारच्या मते, राधिकाच्या वडिलांनी तिचे करिअर संपून जाईल या भीतीपोटीच तिला पळवून नेले होते. त्यानंतर राधिकाचे आईसमोर आली अन् त्यांनी रतनकुमारवर आरोप केले की, त्याने आमच्या मुलीला आमिष दाखवून तिच्याशी लग्न केले. यावेळी राधिकाच्या आईने हादेखील खुलासा केला की, त्यावेळी राधिकाचे वय केवळ १४ वर्षे इतके होते. त्यानंतर २०१० मध्ये स्वत: राधिकानेच हा खुलासा केला की, तिने २००६ मध्येच जेडीएस नेता एच. डी. कुमारस्वामी यांच्याशी लग्न केले. सध्या या दोघांना एक मुलगीही आहे. दरम्यान, संपूर्ण देशात कर्नाटकमधील राजकीय नाट्य चर्चिले जात असताना पुन्हा एकदा राधिका चर्चेत आली आहे. तिला गुगलवर सर्वाधिक सर्चही केले जात आहे. त्यामुळे ती सध्या ट्रेंड होताना दिसत आहे. राधिकाने तिच्या करिअरमध्ये आतापर्यंत जवळपास ३२ चित्रपटांमध्ये अभिनय केला आहे. राधिकाने कन्नड चित्रपटांव्यतिरिक्त काही तामिळ चित्रपटांमध्येही काम केले आहे. आता ती निर्माता म्हणून इंडस्ट्रीत सक्रिय आहे.