आपल्या जबरदस्त अभिनयामुळे कायम प्रेक्षकांचं मनोरंजन करणारी लोकप्रिय जोडी म्हणजे अक्षय कुमार आणि रविना टंडन. आजवर या जोडीने अनेक सिनेमांमध्ये एकत्र काम केलं आहे. मात्र, गेल्या १९ वर्षात ही जोडी एकदाही एकत्र आली नाही. त्यामुळे या दोघांना रुपेरी पडद्यावर पुन्हा एकत्र पाहण्यासाठी चाहते कमालीचे उत्सुक होते. विशेष म्हणजे चाहत्यांची ही इच्छा लवकरच पूर्ण होणार आहे. २००४ नंतर ही जोडी पुन्हा एकदा एकत्र स्क्रीन शेअर करणार आहे.
'वेलकम' हा सिनेमा गाजल्यानंतर त्याच्याच फ्रेंचाइजीमधला 'वेलकम 3' नवा सिनेमा २०२४ मध्ये प्रेक्षकांच्या भेटीला येत आहे. या सिनेमामध्ये अक्षय आणि रविना स्क्रीन शेअर करणार आहेत. या सिनेमामध्ये त्यांच्यासोबत अर्शद वारसी, संजय दत्त, सुनील शेट्टी आणि बॉबी देओल स्क्रीन शेअर करणार असल्याचं म्हटलं जात आहे. परंतु, या नव्या भागात नाना पाटेकर आणि अनिल कपूर नसल्याचं सांगण्यात येत आहे. मात्र, याविषयी कोणतीही अधिकृत माहिती समोर आलेली नाही.
दरम्यान, २००४ मध्ये रविना आणि अक्षय कुमार ऑन-मॅन अॅट वर्कमध्ये एकत्र दिसले होते. त्यानंतर ते फारसे कुठे दिसले नाहीत. यापूर्वी या जोडीने खिलाडियों का खिलाडी, बारूद, किमत, दावा, पोलिस फोर्स यांसारख्या अनेक हिट चित्रपटांमध्ये एकत्र काम केलं आहे.