बॉलिवूडचा खिलाडी अक्षय कुमार (Akshay Kumar) पुन्हा एकदा नेटकऱ्यांच्या निशाण्यावर आला आहे. होय, अक्षयने ट्विटरवर एक व्हिडीओ शेअर केला आणि हा व्हिडीओ समोर येताच, अनेक सोशल मीडिया युजर्सनी अक्कीला ट्रोल करायला सुरूवात केली. अक्षयने शेअर केलेल्या या व्हिडीओमध्ये त्याच्यासह मौनी रॉय, दिशा पटानी, सोनम बाजवा व नोरा फतेही दिसत आहेत. या व्हिडीओत अक्षय, मौनी, नोरा, दिशा सगळे ॲनिमेटेड पृथ्वीवर चालताना दिसत आहे. ‘नॉर्थ अमेरिका टूर’साठीचा हा एक प्रमोशनल व्हिडीओ आहे. पण तूर्तास हा व्हिडीओ पाहून अनेकजण भडकले आहेत. व्हिडीओत अक्षय कुमार भारताच्या नकाशावर चालताना दिसतोय. नेमकी ही गोष्ट नेटकऱ्यांना खटकली आहे.
हा व्हिडीओ पाहून अनेकांनी अक्षयला फैलावर घेतलं आहे. भावा, थोडा तर आदर कर आमच्या भारताचा, असं एका युजरने त्याला म्हटलं आहे. लाज नाही वाटत का? कॅनडियन कुमार तू भारतालाही नाही सोडलंस, अशी संतप्त कमेंट अन्य एका युजरने केली आहे.
ज्या देशात पैसा कमावला, त्याच देशाच्या नकाशावर पाय ठेवताना लाज वाटली नाही का?, अशा शब्दांत एका युजरने त्याला फटकारलं आहे. यासाठी तू माफी मागायला हवीस..., असं एका युजरने म्हटलं आहे.‘नॉर्थ अमेरिका टूर’च्या प्रमोशनसाठी केलेला अक्षय कुमारचा हा व्हिडीओ सोशल मीडियावर व्हायरल होत आहे. या व्हिडीओवरुन नेटकऱ्यांनी अक्षय कुमारला ट्रोल केलं आहे.
येत्या मार्च महिन्यात अक्षय कुमार नॉर्थ अमेरिका टूरवर जाणार आहे. या टूरमध्ये अक्षय नोरा, दिशा, मौनी रॉय व सोनम बाजवासोबत परफॉर्म करणार आहे. अक्षयच्या वर्कफ्रंटबद्दल सांगायचं तर लवकरच त्याचा 'सेल्फी' हा सिनेमा प्रेक्षकांच्या भेटीस येतोय. यात तो इमरान हाश्मीसोबत स्क्रीन शेअर करणार आहे. हा सिनेमा येत्या २४ फेब्रुवारीला रिलीज होणार आहे.