आलिया-सिद्धार्थ आणि वरुणचा डेब्यू चित्रपट 'स्टुडंट ऑफ द ईयर' ला 11 वर्षे पूर्ण

आलिया भट, सिद्धार्थ मल्होत्रा आणि वरुण धवन यांच्या ‘स्टुडन्ट ऑफ द इयर’ या डेब्यू चित्रपटाला 11 वर्षे पूर्ण झाली आहेत.

आलिया भट, सिद्धार्थ मल्होत्रा आणि वरुण धवन यांचा  ‘स्टुडन्ट ऑफ द इयर’ हा चित्रपट सगळ्यांना आठवतच असेल. 2012 साली प्रदर्शित झालेल्या चित्रपटाने तरुणाईला वेड लावलं होतं. करण जोहर दिग्दर्शित या चित्रपटाने बॉक्स ऑफिसवरही जबरदस्त कमाई केली होती. या चित्रपटाच्या माध्यमातून आलिया भट, सिद्धार्थ मल्होत्रा आणि वरुण धवन पहिल्यांदाच मोठ्या पडद्यावर झळकले होते. नुकतचं या चित्रपटाला 11 वर्ष पूर्ण झाली आहे.  डेब्यू चित्रपटाला 11 वर्षे पूर्ण झाल्याच्या निमित्ताने आलिया, वरुण आणि सिद्धार्थने आनंद व्यक्त केला.

आलिया भट्टने तिच्या इंस्टाग्राम स्टोरीवर फ्रॉस्टेड ग्लासवर 11 नंबर लिहून एक भावनिक व्हिडिओ शेअर केला आहे. यासोबतच तिने एक छोटीशी नोटही शेअर केली आहे. तिनं लिहिलं, '11 वर्षे..., वेळ कसा उडत जातो'.

बॉलिवूडमध्ये 11 वर्षे पूर्ण झाल्याबद्दल वरुण धवनने त्याच्या इन्स्टा स्टोरीवर एक व्हिडीओ देखील शेअर केला आहे. ज्यामध्ये त्याला  'बवाल' चित्रपटासाठी सर्वोत्कृष्ट अभिनेत्याचा पुरस्कार मिळत असल्याचे दिसत आहे. यासोबतच त्याने नोटमध्ये लिहिले की, "सिनेसृष्टीत 11 वर्षे पूर्ण केल्याच्या दिवशी सर्वोत्कृष्ट अभिनेत्याचा पुरस्कार मिळाल्याबद्दल मी खूप आभारी आहे". 

सिद्धार्थ मल्होत्राने त्याच्या इन्स्टा स्टोरीवर काही फॅन पोस्ट देखील शेअर केल्या आहेत. 

 करण जोहरने 'स्टुडंट ऑफ द इयर' चित्रपटातून बॉलिवूडला तीन नवे स्टार दिले होते. आज आलिया, वरुण आणि सिद्धार्थ हे बी-टाऊनचे मोठे स्टार आहेत. तिघांनीही आपल्या दमदार अभिनयाने लोकांच्या हृदयात स्थान निर्माण केले आहे. वर्क फ्रंटबद्दल बोलायचे झाले तर आलिया भट्ट लवकरच 'जिगरा' चित्रपटात दिसणार आहे, तर वरुण धवन 'सिटाडेल' मध्ये पाहायला मिळेल.  'योद्धा' या चित्रपटात सिद्धार्थ मल्होत्रा ​​दिसणार आहे.