अमेय वाघ हा मराठी मनोरंजन विश्वातील लोकप्रिय अभिनेता. अमेयला आपण विविध माध्यमांत अभिनय करताना पाहिलंय. वेबसिरीज असो, मालिका असो, चित्रपट असो वा नाटक... अमेय प्रत्येक माध्यमांत स्वतःची छाप पाडतो. अमेयने गेल्या काही वर्षांत केवळ मराठीच नव्हे तर हिंदी मनोरंजन विश्वातही स्वतःच्छा अभिनयाची छाप पाडलीय. अमेयने आज त्याचा मतदानाचा हक्क बजावला. त्यानिमित्त त्याने एक खास पोस्ट केलीय.
अमेयने बोटाला शाई लावल्याचा फोटो दाखवून कॅप्शन लिहिलंय की, "आता कोणीही कुठल्याही पक्षात जावं आणि कोणीही कोणाही बरोबर युती करावी ह्यासाठी मी आज परवानगी देऊन आलो.." अमेयने लिहिलेलं हे मोजकंच पण मार्मिक कॅप्शन अनेकांचं लक्ष वेधून घेतंय. अनेकांनी अमेयने पुणेरी भाषेत टोमणा मारला असल्याचं सांगितलंय. अशाप्रकारे मतदान केल्यानंतर अमेय त्याच्या कॅप्शनमुळे चर्चेत आहे.
अमेय वाघबद्दल बोलायचं झालं तर... 'दिल दोस्ती दुनियादारी' मालिकेतून अमेय खऱ्या अर्थाने खऱ्या अर्थाने लोकप्रिय झाला. या मालिकेत अमेयने साकारलेल्या 'कैवल्य' या भूमिकेचं खूप कौतुक झालं. पुढे अमेयची भूमिका असलेले 'फास्टर फेणे', 'झोंबिवली', 'जग्गू आणि ज्युलिएट', 'मुरांबा', 'मी वसंतराव' अशा सिनेमांमधून त्याच्या अभिनयाची छाप पाडली. अमेयच्या नव्या प्रोजेक्टची सर्वांना उत्सुकता आहे.