'2016' चा शेवट करणार आमिरचा 'दंगल'

सरत्या वर्षाला गुडबाय करण्यासाठी संपूर्ण मुंबई सज्ज झाली आहे. तर दुसरीकडे याच वर्षांच्या शेवटच्या आठवड्यात अभिनेता आमिर खान याचा दंगल चित्रपट प्रदर्शित होतोय. दंगल या वर्षातल्या सर्वात मोठ्या चित्रपटांपैकी एक आहे. 2016 हे वर्ष बॉलिवूडसाठी तसे हा खास नाही राहीले. काहीच चित्रपटांनी बॉक्स ऑफिसवर यश मिळाले तर काही चित्रपट साफ आपटले. आता सगळ्यांचं लक्ष लागलेय ते आमिरच्या दंगल या चित्रपटाकडे. दंगलचा ट्रेलर आणि गाणी प्रेक्षकांच्या पसंतीस उतरली  आहेत. प्रेक्षकांना आमिरच्या दंगल या चित्रपटांकडून बऱ्याच आशा आहेत तर काहींना दंगल हा चित्रपट या वर्षातला सर्वाधिक हिट चित्रपट ठरेल असे वाटते आहे.      अगदी चित्रिकरणाच्या आधीपासूनच पहेलवान महावीर फोगट यांच्या जीवनावर आधारित या चित्रपटाची चर्चा बी टाऊनमध्ये रंगली होती. त्यात दिवाळीच्या आसपास  दंगलचे ट्रेलर आले आणि या ट्रेलरने प्रेक्षकांची मने जिंकलीत. ट्रेलर आऊट झाल्यापासून प्रेक्षक या चित्रपटाच्या प्रदर्शनाकडे डोळे लावून बसले आहेत. सरत्या वर्षांचा हिशेब करताना आपल्यापैकी प्रत्येकजण काहीसा उदास असेल. मात्र याचवेळी  नव्या वर्षात जगण्याची नवी उमेद आणि उत्साह देणारा दंगल प्रदर्शित होईल. त्यामुळेच दंगल हा सिनेमा बॉलिवूडसाठी यावर्षांची ‘फिनाले दंगल’ असेल, असे म्हणणे चूक ठरणार नाही. डिज्ने प्रस्तूत दंगल हा सत्य घटनेवर आधारित आणि तगड्या कलाकारांची फौज असलेला चित्रपट आहे. आमिर खान- किरण राव आणि सिद्धार्थ रॉय कपूर यांची निर्मिती असलेला हा चित्रपट नितेश तिवारीने दिग्दर्शित केला आहे..