सुमारे सहा वर्षांनंतर अमृता राव मोठ्या पडद्यावर परतणार आहे. ‘ठाकरे’ या चित्रपटातून अमृता बॉलिवूडमध्ये वापसी करतेय. तूर्तास अमृता आपल्या या आगामी चित्रपटाच्या प्रमोशनमध्ये व्यस्त आहे. अशाच एका प्रमोशनल इव्हेंटमध्ये अमृताने इंडस्ट्रीतील एक अतिशय वाईट अनुभव शेअर केला.होय, एका चित्रपटातून तिला एका रात्रीत कसे रिप्लेस केले गेले, हे तिने सांगितले.
ती म्हणाली की, एका मोठ्या मेकर्सने मला आपल्या चित्रपटाची स्क्रिप्ट ऐकवली. केवळ इतकेच नाही तर या चित्रपटासाठी लीड अ‍ॅक्ट्रेस म्हणून मला साईनही केले. पण यानंतर एक दिवस अचानक माझ्याजागी एका स्टार किड्ला रिप्लेस केले गेले. माझ्यासाठी हे प्रचंड धक्कादायक होते. काही दिवसानंतर हे सगळे एका मोठ्या स्टारच्या सांगण्यावरून झाल्याचे मला कळते. त्या बड्या स्टारने फोन केला आणि त्याच्या एका फोनवर माझी चित्रपटातून हकालपट्टी करण्यात आली. माझ्या जागी एका स्टार किडला संधी दिली गेली. हे ऐकून मला प्रचंड दु:ख झाले. खरे तर इंडस्ट्रीत हे असे होतेच. पण किमान तुला चित्रपटातून काढले, हे मला सन्मानपूर्वक सांगितले जाईल, अशी अपेक्षा होती. पण याऊलट त्या मेकर्सने मला अतिशय अपमानास्पद वागणूक दिली. या अशा अनुभवानंतर माझा कुणी गॉडफादर असता तर, असा विचार अनेकदा माझ्या मनात आला. किमान इंडस्ट्रीत काम कसे मिळवायचे, हे तरी मला माझ्या गॉडफादरने शिकवले असते, असे अमृता म्हणाली.