Ananya Panday Video: चंकी पांडेची लेक अनन्या पांडेचा (Ananya Panday) बॉलिवूडमध्ये ग्रँड डेब्यू झाला आणि अल्पावधीत तिने स्वत:ची एक वेगळी ओळख निर्माण केली. अनन्या तशीही चर्चेत असते आणि बहुतेकदा कपड्यांमुळे तिची चर्चा होते. ‘गहराइयां’चं प्रमोशन असो की ‘लाइगर’चं..., प्रत्येक चित्रपटाच्या प्रमोशनवेळी अनन्या कपड्यांमुळे चर्चेत आली. अनेकदा कपड्यांनी तिची फजितीही केली. आता पुन्हा एकदा अनन्या अशाच कारणाने चर्चेत आहे. अनन्याचा एक व्हिडीओ समोर आला आणि तो पाहून चाहत्यांना हसू आवरलं नाही.
अनन्याला कदाचित वेगळं काही करायचं होतं आणि झालं भलतंच. सध्या अनन्या याचमुळे ट्रोल होतेय. सोशल मीडिया युजर्स तिची खिल्ली उडवत आहेत. सेलिब्रिटी फोटोग्राफर विरल भयानीने अनन्याचा एक व्हिडीओ शेअर केला आहे. या व्हिडीओत ती नेहमीपेक्षा फारच उंच दिसतेय. अगदी तिच्या बाजूला उभे लोक तिच्या खांद्यापर्यंतही नाहीत. हा व्हिडीओ व्हायरल झाला आणि अनेकांनी अनन्याची मजा घेतली.
हाहाहा... सर्कसवाला आदमी..., अशी कमेंट करत एका युजरने तिला ट्रोल केलं. कदाचित सर्कशीत काम करण्याचा प्लान दिसतोय, अशी कमेंट एका युजरने केली. काहींनी तिला स्कूल का ब्लॅकबोर्ड म्हणून चिडवलं तर काहींनी 5 जी म्हणत तिची टर उडवली. हिच्यासमोर तर ग्रेट खली सुद्धा ठेंगणा दिसू लागलाये, असं एकाने लिहिलं. एका युजरने तर ‘कुतूबमिनार पांडे’ असं तिचं नामकरणच केलं.
अनन्या पांडे नुकतीच विजय देवरकोंडासोबत ‘लाइगर’ या सिनेमात दिसली. तिचा हा सिनेमा दणकून आपटला होता. यानंतरही अनन्या प्रचंड ट्रोल झाली होती. अनेकांनी ‘लाइगर’मधील अनन्याचा अभिनय पाहून तिला ट्रोल केलं होतं. धर्मा प्रॉडक्शनमधून डेब्यू करणारी अनन्या लवकरच धर्मा प्रॉडक्शनमधून ओटीटीवर पदार्पण करणार आहे. धर्मा बॅनरच्या ‘कॉल मी बे’ या वेबसीरिजमध्ये ती झळकणार असल्याचं कळतंय.