Argentina wins World Cup 2022: फिफा विश्वचषक स्पधेर्तील आतापर्यंतच्या सर्वात थरारक फायनलपैकी एक ठरलेल्या रविवारच्या सामन्यात अर्जेंटिनाने फ्रान्सचा पराभव केला. तब्बल 36 वर्षांनी अर्जेंटिनाचं जगज्जेते बनण्याचं स्वप्न पूर्ण झालं. मेस्सीच्या चाहत्यांचं स्वप्नही याक्षणी पूर्ण झाला. त्याला विश्वचषक जिंकताना पाहून जगभरातील त्याच्या चाहत्यांनी आनंदोत्सव साजरा केला. अशात अचानक अक्षय कुमारही चर्चेत आला आहे. आता अक्षय कुमार (Akshay Kumar ) आणि मेस्सीचा काय संबंध असा प्रश्न तुम्हाला पडला असेलच. तर सध्या सोशल मीडियावर अर्जेंटिनाच्या जर्सीमधील अक्षय कुमारचे फोटो शेअर केले जात आहे. पाठोपाठ अक्षय कुमार मेस्सीचं बायोपिक ( Messi biopic) करणार असून त्यात मेस्सीची भूमिका साकारणार असल्याचं म्हटलं जात आहे. अगदी अक्षयने मेस्सीच्या बायोपिकसाठी तयारी सुरू केली असल्याचंही म्हटलं जात आहे.
अर्थात असं काहीही नाही. अक्षयचे हे फोटो ‘हाऊसफुल 3’च्या एका सीनमधील आहेत. सध्या त्याचे हेच फोटो शेअर केले जात आहेत आणि त्यावरून युजर्स अक्कीची मजा घेत आहेत.
अक्षय कुमार मेस्सीच्या बायोपिकसाठी सज्ज आहे, असं एका युजरने म्हटलं आहे. अन्य एका युजरने तर या बायोपिकचं नावही सुचवलं आहे. Lionel Messi: The Legend of Argentina बायोपिक येतंय आणि यात अक्षय कुमार आहे, असं या युजरने लिहिलं आहे. अक्षयने कधीच मेस्सीच्या बायोपिकची तयारी सुरू केलीये, असंही अनेक युजर्सनी म्हटलं आहे.
अक्षयला बॉलिवूडच्या बायोपिकचा किंग म्हटलं जातं. अलीकडच्या काळात अक्षयने एक ना अनेक बायोपिकमध्ये काम केलं. पण यातले काही बायोपिक फ्लॉप झालेत. युजर्स यामुळेच अक्षयची मजा घेत आहेत. त्यामुळेच रात्री फिफा वर्ल्डकपचा थरार रंगला आणि सकाळी अक्षय कुमारचे फोटो व्हायरल व्हायला सुरूवात झाली.