किंग खान शाहरुख(Shah Rukh Khan)चा 'पठाण' (Pathaan Movie) चित्रपट २५ जानेवारीला रिलीज होतो आहे. शाहरुख खान चार वर्षांनंतर मोठ्या पडद्यावर पुनरागमन करतो आहे. हा स्पाय थ्रिलरवर आधारित चित्रपट आहे. दीपिका पादुकोण (Deepika Padukone) शाहरुखसोबत रोमँटिक अंदाजात दिसणार आहे. त्याचबरोबर जॉन अब्राहम यात निगेटिव्ह भूमिका साकारताना दिसणार आहे. चित्रपटाच्या प्रदर्शनासाठी केवळ तीन दिवस उरले असून शाहरुख खानचे चाहते खूप उत्सुक आहेत. अनेक ठिकाणी चित्रपटगृहे हाऊसफुल्ल झाली आहेत.
शाहरुख खानच्या चाहत्यांनी पठाण चित्रपटाची आगाऊ तिकिटे आधीच बुक केली आहेत. चाहत्यांची क्रेझ एवढी आहे की एका फॅन पेजने संपूर्ण थिएटर बुक केले आहे. शाहरुख खान बॉक्स ऑफिसवर काय धुमाकूळ घालणार हे पाहणे उत्सुकतेचे ठरणार आहे. चित्रपटाच्या रिलीजच्या तीन दिवस आधी, किंग खानने त्याच्या चाहत्यांचे आभार आणि मनोरंजन करण्यासाठी ट्विटरवर #AskSRK सेशन केले.
आस्क मी एनिथिंग सत्रादरम्यान, एका ट्विटर युजरने शाहरुख खानला विचारले की तो पठाणची दोन तिकिटे खरेदी करू शकतो का कारण बुक माय शो अॅप क्रॅश झाला होता आणि त्याला फर्स्ट डे फर्स्ट शो पाहायचा आहे. या प्रश्नाच्या उत्तरात सुपरस्टारने लिहिले, "नाही तिकिट तर तुम्हाला स्वतःला खरेदी करावे लागेल... क्रॅश किंवा नो क्रॅश...".
याशिवाय एका यूजरने शाहरुख खानला विचारले की, 'पठाण' चित्रपट कसा आहे? म्हणजेच थेट युजरने त्याला चित्रपटाचे रिव्ह्यू विचारला. यावर शाहरुख म्हणाला, "आम्ही निर्माते आहोत, समीक्षक नाही. दोघांचीही कामे वेगळी आहेत. चित्रपट बनवण्याच्या आनंदाला तोड नाही. त्यामुळे चित्रपट कसा असेल हे यावरून समजून घ्या."