KL Rahul-Athiya Shetty Wedding : बॉलिवुड अभिनेत्री अथिया शेट्टी आणि क्रिकेटपटू के एल राहुल आज लग्नबंधनात अडकत आहेत. संध्याकाळी ४ वाजता हा लग्नसोहळा पार पडणार असून काल रात्री संगीत फंक्शन अगदी धुमधडाक्यात झाले. या संगीत सोहळ्याची खास झलक सध्या सोशल मीडियावर व्हायरल होत आहे.
मंडप सज्ज आहे, लग्नाची लगबग सुरु आहे. अभिनेता सुनील शेट्टीच्या (Suniel Shetty) खंडाळा येथील फार्महाऊसवर सनई चौघडे वाजण्यास सुरुवात झाली आहे. या लग्नसोहळ्यासाठी पाहुणेही दाखल झाले असून आज संध्याकाळी चार वाजता नवरा नवरी सात फेरे घेतील. काल रात्री उशिरा फार्म हाऊस संगीत सोहळा पार पडला. बॉलिवू़ड फोटोग्राफर व्हिरल भयानी यांच्या इन्स्टाग्रावर व्हिडिओ शेअर करण्यात आला आहे.
अर्जुन कपूरही पोहोचला
अथिया आणि के एल राहुलच्या लग्नासाठी अनेक सेलिब्रिटी दाखल झाले आहेत. यामध्ये काल उशिरा अर्जुन कपूरला पाहिले गेले. याशिवाय सेलिब्रिटी फोटोग्राफर रोहन श्रेष्ठा, पंजाबी गायक गिप्पी ग्रेवाल देखील पोहोचले. सोशल मीडियावर पाहुण्यांचे फोटोही व्हायरल होत आहेत.
माध्यमांच्या रिपोर्ट्सनुसार संध्याकाळी ४ वाजता अथिया आणि राहुल सात फेरे घेत लग्नबंधनात अडकतील. तर संध्याकाळी ६.३० वाजता ते माध्यमांसमोर येणार आहेत. लग्नात सुमारे १०० पाहुण्यांचा समावेश आहे.
एका कॉमन फ्रेंड च्या माध्यमातून अथिया आणि राहुल यांची एकमेकांशी ओळख झाली होती,. हळूहळू मैत्रीचे रुपांतर प्रेमात झाले. दोघांनी अनेक दिवस हे नातं माध्यमांसमोर लपवून ठेवलं. मात्र अथियाचा भाऊ अहान शेट्टीच्या डेब्यू फिल्मच्या स्क्रीनिंग वेळी दोघांनी एकत्र येत नातं अधिकृत केलं. आता दोघेही आज लग्नबंधनात अडकत आहेत.