‘रेस3’नंतर बॉबी देओलची गाडी सूसाट पळू लागलीय. ‘हाऊसफुल4’ आणि ‘यमला पगला दीवाना फिर से’च्या सेटवरचे बॉबीचे अनेक फोटो समोर आले आहेत. आता ‘यमला पगला दीवाना फिर से’चे नवीन गाणे रिलीज झाले आहे. ‘नजरबट्टू मैं तेरा बना’ असे या गाण्याचे शब्द आहेत. या गाण्यात बॉबी देओल आणि कृति खरबंदा यांची लव्ह केमिस्ट्री जशी पाहण्यासारखी आहे, तशीच बॉबीची डान्सिंग स्टाईलही पाहण्यासारखी आहे. हे टीपिकल गाणे बॉलिवूड स्टाईलमध्ये शूट करण्यात आले आहे. यात बॉबी बॉलिवूड स्टाईलचा डान्स करताना दिसतोय. विशेष म्हणजे, प्रेक्षकांना त्याचा हा अंदाज चांगलाच आवडला आहे.
या गाण्याला सचेत टंडनने आपला आवाज दिला आहे. धर्मेंद्र, सनी आणि बॉबी देओल यांची मुख्य भूमिका असलेल्या 'यमला पगला दिवाना फिर से' मध्ये बॉबी देओल महत्त्वपूर्ण भूमिका साकारताना दिसणार आहे. तसेच या तिघांच्या गॅंगसोबतच सलमान खान पाहुणा कलाकार म्हणून एका सीनमध्ये एन्ट्री करणार असल्याचे सूत्रांकडून समजते आहे. 'यमला पगला दिवाना फिर से' हा संपूर्ण कौटुंबिक मनोरंजन करणारा सिनेमा असल्याचे बोलले जात आहे. मागील दोन भागांप्रमाणेच बॉबी देओल आणि सनी देओल भाऊ म्हणूनच या सिनेमातही व्यक्तिरेखा साकारतील. कृति चित्रपटात नायिकेच्या भूमिकेत दिसणार आहे. तर धर्मेंद्र यांची भूमिका प्रेक्षकांसाठी सरप्राईज असून या नवीन भागात ते वकिलाच्या भूमिकेत दिसतील.'यमला पगला दीवाना फिर से' चित्रपट आधी १५ ऑगस्टला प्रदर्शित होणार होता. पण, त्याच दिवशी अक्षय कुमारचा गोल्ड व जॉन अब्राहमचा 'सत्यमेव जयते' देखील प्रदर्शित होणार होता. बॉक्स ऑफिसवरील क्लॅशपासून बचाव करण्यासाठी निर्मात्यांनी चित्रपटाच्या प्रदर्शनाची तारीख पुढे ढकलली आहे. 'यमला पगला दिवाना फिर से' हा चित्रपट ३१ ऑगस्टला प्रदर्शित होणार आहे.