Rani Mukerji : आपल्या उत्कृष्ट अभिनयाने, आवाजाने आणि आपल्या सौंदर्याने वर्षानुवर्षे चाहत्यांची मने जिंकणारी अभिनेत्री म्हणजे राणी मुखर्जी. राणीने तिच्या कारकिर्दीत एकापेक्षा एक चित्रपट केले आहेत. राणी मुखर्जीने 1996 मध्ये 'बियर फूल' या बंगाली चित्रपटातून तिच्या करिअरला सुरुवात केली. तर 'राजा की आयेगी बारात' या चित्रपटातून तिने बॉलिवूडमध्ये पदार्पण केले. तिने बॉलिवूडमधील अनेक दिग्गज कलाकारांसोबत काम केले आहे. असाच एक अभिनेता आहे, जो राणीला थेट 'दीडफुट्या' (डेढ फुटिया) या नावाने हाक मारायचा. तो किस्सा काय आहे, ते आपण जाणून घेऊया.
राणीला 'दीडफुट्या' नावाने हाक मारणारा हा अभिनेता तिचा खास मित्र आहे. दोघांनी अनेक चित्रपटात एकत्र काम देखील केलं आहे. तो अभिनेता म्हणजे बॉबी देओल. 'कॉफी विद करण'च्या 8 व्या सीझनमधील एका एपिसोडमध्ये खुद्द अभिनेत्याने तो राणीला मस्करीत 'दीडफुट्या' या नावाने हाक मारायचा, याचा खुलासा केला होता. शिवाय, यावर राणीही बॉबीला 'बोबड्या' म्हणून खिल्ली उडवायची, हेही बॉबीने सांगितले.
राणी आणि बॉबी भलेही चांगले मित्र असतील पण 2000 नंतर ते दोघे पुन्हा कधीही एकाही चित्रपटात एकत्र दिसले नाहीत. राणीच्या वर्कफ्रंटबद्दल बोलायचं झालं तर लवकरच तिच्या 'मर्दानी' सिनेमाचा तिसरा भाग प्रेक्षकांच्या भेटीला येणार आहे. पुन्हा एकदा राणी मुखर्जी मुंबई क्राइम ब्रँचची पोलीस अधिकारी शिवानी शिवाजी रॉयच्या भूमिकेत दिसणार आहे. तर बॉबी देओलच्या कामाबद्दल बोलायचं तर तो 'कंगुवा' सिनेमात झळकणार आहे. यात त्याचा दमदार खलनायकी अवतार पाहायला मिळणार आहे.