संदीप रेड्डी वांगा दिग्दर्शित Animal सिनेमात बॉबी देओलच्या (Bobby Deol) कामाची खूप प्रशंसा केली जात आहे. त्याचा फिटनेस आणि अभिनयाने लोकांना वेडं केलं आहे. काही मिनिटांसाठी आलेल्या बॉबीने अख्खा पिक्चरच खाल्ला आहे. 'आश्रम' वेबसिरीजनंतर बॉबीचा Animal सुपरहिट ठरला. त्यामुळे आता त्याचा भाव चांगलाच वधारला आहे. पण ते म्हणतात ना यश मिळालं की हवा डोक्यात जाते. तसंच काहीसं बॉबीचं झालं आहे का असा प्रश्न चाहत्यांना पडलाय. बॉबीच्या व्हायरल व्हिडिओमधून त्याचा प्रत्यय येतो.
काय आहे तो व्हिडिओ?
बॉबी देओल १४ डिसेंबर रोजी विमानतळावर दाखल झाला. त्याला बघताच पापाराझींनी त्याला कॅमेऱ्यात कैद करण्यासाठी गर्दी केली. तसंच चाहत्यांनीही बॉबीला पाहताच त्याच्याभोवती गराडा घातला. ब्लॅक प्रिंटेड शर्ट, ब्लॅक पँट, गॉगलमध्ये तो नेहमीप्रमाणेच हँडसम दिसत होता. पण तो प्रचंड घाईत असल्याचं स्पष्ट दिसत होतं. आपल्या टीमसोबत तो घाईत वेगाने चालत जात होता. तेव्हा वाटेतच अभा असलेल्या एका माणसाला त्याने खांद्याला धरुन बाजूला सारले. बॉबीचा हा अवतार नेटकऱ्यांना मात्र चांगलाच खटकला आहे. 'बॉलिवूड शादीज' या इन्स्टाग्राम पेजने हा व्हिडिओ त्यांच्या इन्स्टाग्राम अकाऊंटवर पोस्ट केला आहे.
बॉबी देओलच्या या व्हिडिओवर नेटकऱ्यांनी कमेंट करत त्याच्यावर टीका केली आहे. 'एक फिल्म काय हिट झाली यश डोक्यात गेलं','फ्लॉपवरुन एक सिनेमा काय हिट झाला जास्तच उड्या मारतोय' अशा शब्दात नेटकऱ्यांनी बॉबीला निशाण्यावर धरलं. बॉबीने Animal सिनेमात 'अबरार' ही निगेटिव्ह भूमिका साकारली आहे. तो अजूनही त्याच कॅरेक्टरमध्ये आहे का असा प्रश्न नेटकऱ्यांनी विचारला आहे.
याआधी बॉबी देओलचा भाऊ सनी देओलचाही अशाच प्रकारचा व्हिडिओ व्हायरल झाला होता. 'गदर 2' च्या यशानंतर सनी देओलही विमानतळावर एका चाहत्यावर चांगलाच भडकला होता. तेव्हा सनीवरही जोरदार टीका झाली होती.