बॉलिवूडचा बहुचर्चित चित्रपट ‘अर्थ’ कोण विसरू शकेल? ‘तुम इतना जो मुस्कुरा रहे हो...’ हे गाणं आठवलं की ‘अर्थ’ हा सिनेमा हमखास आठवतो. पाठोपाठ आठवतात ते शबाना आझमी आणि अभिनेता राज किरण. 80 च्या दशकापर्यंत मोठा पडदा गाजवणारा राज किरण (Raj Kiran) नावाचा हा अभिनेता अचानक अंधारात गुडूप झाला. तो कुठे आहे, कुठल्या स्थितीत आहे, याची दखलही कुणी घेतली नाही. दशकभरानंतर काहींना जाग आली. यानंतर अनेकांनी राज किरणचा शोध सुरु केला. या काळात कधी त्याच्या मृत्यूची अफवा उडाली. काहींनी तो मनोरूग्णालयात असल्याचं म्हटलं तर काहींनी तो न्यूयॉर्कमध्ये टॅक्सी चालवताना दिसल्याचा दावा केला. पण राज किरण कधीच परतला नाही.
‘कर्ज’मध्ये राज किरणसोबत काम करणारे ऋषी कपूर यांनीही त्याला शोधण्याचे प्रयत्न केलेत. 2011 मध्ये ऋषी कपूर राज किरणचा भाऊ गोविंद मेहतानी याला भेटले होते. राज किरण गत दहा वर्षांपासून अमेरिकेत अटलांटाच्या एका मनोरूग्णालयात असल्याची माहिती गोविंद यांनी ऋषी कपूर यांना दिली होती. भावाने दिलेल्या माहितीनुसार, राज किरणला पत्नीने धोका दिला. हा आघात राज किरणला सोसवला नाही आणि तो डिप्रेशनमध्ये गेला. पुढे त्याचे मानसिक संतुलन ढासळलं. अर्थात राज किरणची पत्नी रूपाने हा दावा फेटाळून लावला होता.
काहींच्या मते, चित्रपटांमध्ये काम करणं कमी केल्यानंतर राज किरणची आर्थिक परिस्थिती ढासळली होती. डिप्रेशनवर उपचार घेताघेता त्याच्याजवळचे सगळे पैसे संपले होते. राज किरणची तब्येत खालावत असताना त्याची पत्नी रुपा हिने त्याची साथ सोडली होती.
राज किरणचा अद्यापही पत्ता नाही. पण रिपोर्टनुसार, राज किरणची अनेक वर्ष प्रतीक्षा केल्यानंतर त्याची पत्नी रूपा हिने दुसरं लग्नं केलं आहे. आता ती रूपा मशरूवाला या नावानं ओळखली जाते. राज किरणपासून झालेली तिची मुलगी रिशिका महतानी शाह (Rishika Mahtani ) आता बरीच मोठी झाली आहे. 11 वर्षांपूर्वी राज किरण मनोरूग्णालयात आहे, अशी चर्चा सुरू झाल्यावर रिशिका पहिल्यांदा चर्चेत आली होती. माझ्या वडिलांबद्दलच्या सगळ्या चर्चा या अफवा असल्याचं तिने स्पष्ट केलं होतं.
रिशिका सोशल मीडियावर प्रचंड अ‍ॅक्टिव्ह आहे. एक ब्लॉगर आणि ज्वेलरी डिझाईनर असलेली रिशिकाने 2014 सानी रवी शाहसोबत लग्न केलं. रिशिकाचे बोल्ड फोटो सध्या व्हायरल होत आहेत. रिशिका लाईम लाईटपासून दूर राहते. पण सौंदर्याच्या बाबतीत ती बॉलिवूड अभिनेत्रींपेक्षा कमी नाही. रिशिका आजही आपल्या वडिलांचे फोटो शेअर करताना दिसते. वडिलांच्या प्रत्येक वाढदिवसाला ती पोस्ट शेअर करते.
राज किरणची रिशिकाशिवाय आणखी एक मुलगी आहे. तिचं नाव मन्नत महतानी आहे. ती अमेरिकेत राहते. राज किरण 80 च्या दशकात बॉलिवूडमधील लोकप्रिय अभिनेत्यांपैकी एक होता. राज किरण बहुतेक चित्रपटांमध्ये सहाय्यक भूमिकेत दिसला. ‘कर्ज’, ‘बसेरा’ आणि ‘अर्थ’ यांसारख्या चित्रपटांसाठी राज किरण आजही लोकांच्या लक्षात आहेत.