बॉलिवूडची बेबो म्हणजेच करीना कपूर पुन्हा एकदा सर्वांना गुड न्यूज देणार आहे. हे ऐकून तुमचा गोंधळ उडाला असेल ना कीकरीनाकडे पुन्हा एकदा गोड बातमी आहे की काय? पण तसे काही नाही. 'गुड न्यूज' या आगामी सिनेमात ती झळकणार आहे. या चित्रपटात तिच्यासोबत अभिनेता अक्षय कुमार दिसणार आहे.
अक्षयने सांगितले की, 'मी आणि करीना एका चित्रपटात एकत्र येत असून या सिनेमाचे नाव 'गुड न्यूज' आहे.' या चित्रपटाची निर्मिती धर्मा प्रोडक्शनने केली आहे. हा चित्रपट विनोदी असल्याचे सूत्रांकडून समजते आहे. या चित्रपटाचे दिग्दर्शन राज मेहता करणार असल्याचे समजते आहे.सूत्रांच्या माहितीनुसार, करीना कपूर अक्षयसोबत काम करण्यास उत्सुक आहे. 'वीरे दी वेडींग'च्या प्रदर्शनानंतर बेबोने हा चित्रपट साइन केला. या सिनेमाची कथा एका कपलवर आधारीत असून निर्मात्यांनी करीनासोबत अक्षयची निवड केली आहे.'हाऊसफुल 4' चित्रपटाचे चित्रीकरण पूर्ण केल्यानंतर अक्षय कुमार या सिनेमाच्या शूटिंगला सुरुवात करणार आहे. तर करीनाला ‘वीरे दी वेडींग’च्या प्रदर्शनानंतर काही दिवसांचा ब्रेक घेऊन कुटुंबासोबत आणि खास करुन तैमुरसोबत वेळ घालवण्याची इच्छा होती. तिने या इच्छेप्रमाणे कुटुंबासमवेत छान वेळ घालवल्यावर आता पुन्हा कामावर रुजू होण्यासाठी सज्ज झाली आहे. करीनाचा पोस्ट प्रेग्नन्सीनंतरचा ‘वीरे दी वेडींग’ हा पहिलाच सिनेमा होता. या चित्रपटाने बॉक्स ऑफिसवर खूप चांगली कमाई करीत शंभर कोटींचा पल्ला गाठला होता. करणच्या 'गुड न्यूज' चित्रपटात लग्न आणि रिलेशनशिपबद्दलच्या बारिक-सारिक गोष्टी दाखविल्या जाणार आहेत. हा एक रोमॅण्टिक चित्रपट असणार आहे. मात्र या चित्रपटातून एक चांगला संदेशही दिला जाणार आहे. या चित्रपटातील इतर तीन मुख्य भूमिका साकारणाऱ्या कलाकारांबद्दल अद्यापपर्यंत कुठलीही माहिती समोर आली नाही. करीना व अक्षयची केमिस्ट्री रुपेरी पडद्यावर पाहणे कमालीचे ठरणार आहे.