Drishyam 2 Box Office Collection: अभिषेक पाठक यांनी दिग्दर्शित केलेला ‘दृश्यम 2’ (Drishyam 2) हा सस्पेन्स थ्रीलर सिनेमा अजूनही गर्दी खेचतोय. होय, अजय देवगण (Ajay Devgn) , तब्बू, अक्षय खन्ना, श्रीया सरन यांच्या मुख्य भूमिका असलेल्या या सिनेमानं बॉक्स ऑफिसवर नुसता धुमाकूळ घातला आहे आणि आता हा सिनेमा 200 कोटींच्या क्लबमध्ये सामील झाला आहे. शनिवारी या सिनेमाने 200 कोटींचा आकडा पार केला. काल रविवारी ‘दृश्यम 2’ने कमाईच्या बाबतीत रोहित शेट्टीच्या ‘गोलमाल अगेन’ (Golmaal Again) या हॉरर कॉमेडी सिनेमाला मागे टाकलं.
‘दृश्यम 2’ रिलीज होऊन 24 दिवस झाले आहेत. 24 दिवसांनंतरही हा सिनेमा पाहण्यास लोक गर्दी करत आहेत. यंदाच्या सर्वात मोठ्या हिट हिंदी चित्रपटांच्या यादीत स्थान मिळवणाऱ्या ‘दृश्यम 2’ रविवारी कमाईच्या बाबतीत ‘गोलमाल अगेन’ला मात दिली. ‘गोलमाल अगेन’ या सिनेमा अजय देवगण हाच लीड भूमिकेत होता. 2017 मध्ये रिलीज झालेल्या या सिनेमाने बॉक्स ऑफिसवर 205 कोटींचा बिझनेस केला होता. ‘दृश्यम 2’ने हा कमाईचा आकडा कालच पार केला. रिपोर्टनुसार, काल रविवारपर्यंत ‘दृश्यम 2’ने 209.04 कोटींची कमाई केली.
18 नोव्हेंबरला प्रदर्शित झालेला हा सिनेमा प्रेक्षक पुन्हा पुन्हा सिनेमागृहात जाऊन पाहत आहेत. रिपोर्टनुसार, या सिनेमाने रिलीजच्या चौथ्या शनिवारी बॉक्स ऑफिसवर 4.65 कोटींची कमाई करत 200 कोटींचा टप्पा पार केला आहे. रविवारी या सिनेमाने 5.47 कोटींचा गल्ला जमवला.
‘तान्हाजी’चा रेकॉर्ड मोडणार का? 2020 साली रिलीज झालेल्या अजय देवगणच्या ‘तान्हाजी-द अनसंग वॉरिअर’ या सिनेमाने 279 कोटींची कमाई केली. त्यानंतर आता ‘दृश्यम 2’ हा सिनेमा 200 कोटींच्या क्लबमध्ये सामील झाला आहे. लवकरच हा सिनेमा 250 कोटींचा टप्पा पार करू शकतो, अशी शक्यता वर्तवली जात आहे. मात्र 50 कोटींच्या बजेटमध्ये बनलेला ‘दृश्यम 2’ येत्या काळात ‘तान्हाजी’चा रेकॉर्ड मोडणार का? हे पाहणं इंटरेस्टिंग असणार आहे.
2022 मध्ये हे सिनेमे 200 कोटी पार...अजय देवगणच्या ‘दृश्यम 2’ने 200 कोटींचा आकडा पार केला आहे. यावर्षात अनेक सिनेमांनी 200 कोटींपार कमाई केली. यात ब्रह्मास्त्र, द कश्मीर फाइल्स, गंगूबाई काठियावाडी, भूल भुलैया या चित्रपटांचा समावेश आहे.