इमरान हाश्मीने आता जरी सिनेमांची वेगळी वाट निवडली असली तरी कोणे एके काळी सीरियल किसर म्हणून त्याची ओळख होती. इमरानने 'मर्डर', 'आशिक बनाया आपने', 'अकसर', 'झहर' अशा सिनेमांमध्ये बोल्ड आणि बिनधास्त भूमिका साकारुन स्वतःची वेगळी ओळख मिळवली. इमरान हाश्मी आणि विद्या बालन यांची ऑनस्क्रीन जोडीही पडद्यावर खूप गाजली. या दोघांनी 'घनचक्कर' सिनेमात एकत्र काम केलं होतं. त्यावेळी विद्याला किस करताना इमरान तिला वारंवार एक विचित्र प्रश्न विचारायचा. काय होता तो किस्सा? जाणून घ्या
विद्याला इमरान हाश्मी किस केल्यावर काय विचारायचा?
नेहा धूपियाच्या पॉडकास्ट शोमध्ये विद्या बालनने इमरान आणि तिच्या किसिंग सीनबद्दल मनमोकळ्या गप्पा मारल्या. विद्या बालन म्हणाली, "घनचक्कर सिनेमात प्रत्येकवेळी किस केल्यानंतर इमरान हाश्मी मला विचारायचा की, सिद्धार्थ रॉय कपूर हा सीन बघितल्यावर काय म्हणेल? मला माझं पेमेंट चेक मिळेल ना?" असा गमतीशीर प्रश्न इमरान विद्याला विचारायचा. यामागचं कारण म्हणजे 'घनचक्कर' सिनेमा विद्या बालनचा पती सिद्धार्थ रॉय कपूर यांच्या UTV मोशन पिक्चर्सने प्रोड्यूस केला होता. त्यामुळे इमरान किसिंग सीन करताना विद्याला मुद्दाम हा प्रश्न विचारुन चिडवायचा.
विद्या बालनचा भूल भूलैय्या ३ आज झालाय रिलीज
विद्या बालनचा गेल्या अनेक वर्षांपासून चर्चेत असलेला 'भूल भूलैय्या ३' सिनेमा आज रिलीज झालाय. 'भूल भूलैय्या ३' मध्ये कार्तिक आर्यन प्रमुख भूमिकेत आहे. याशिवाय विद्या पुन्हा एकदा मंजुलिकाच्या रुपात प्रेक्षकांच्या भेटीला येणार आहे. या दोघांसोबतच सिनेमात तृप्ती डिमरी, माधुरी दीक्षित, विजय राज, संजय मिश्रा या कलाकारांच्या प्रमुख भूमिका आहेत. विद्या बालनच्या 'भूल भूलैय्या ३'ला अजय देवगणच्या 'सिंघम अगेन' सिनेमाची तगडी टक्कर आहे.