बॉलिवूड अभिनेता सुशांत सिंह राजपुतचे जगभरात कोटींच्या घरात चाहते आहेत. त्याच्या मृत्यूला आता दोन महिने पूर्ण झाले आहेत. सध्या ईडी आणि सीबीआयमार्फत या प्रकरणाची वेगाने चौकशी सुरु आहे. मात्र सुशांतच्या मृत्यूचं खरं कारण अद्याप समोर आलेलं नाही. त्यामुळे या प्रकरणातील खऱ्या गुन्हेगारांना शिक्षा व्हावी चाहत्यांनी सुशांतच्या कुटुंबीयांमागे भक्कमपणे उभं राहावं अशी विनंती सुशांतची बहिणी श्वेता सिंह किर्ती हिने केली आहे. तब्बल १०१ देशांमधील चाहत्यांनी सुशांतच्या मृत्यूस कारणीभूत असलेल्या गुन्हेगारांना शिक्षा व्हावी म्हणून प्रार्थना केली आहे.
सुशांतच्या आत्म्याला शांती मिळावी यासाठी किर्तीने एक व्हर्चुअल शोक सभा आयोजित केली होती. या सभेला तब्बल १०१ देशांमधील लोकांनी आपली उपस्थिती दर्शवली होती. या मंडळींनी सुशांतसाठी गायत्री मंत्राचा जप केला. किर्तीने इन्स्टाग्रामवर एक फोटो पोस्ट करुन याबाबत माहिती दिली. ‘मला सकारात्मक भावनेची जाणीव होत आहे. या शोकसभेत उपस्थित राहून सुशांतसाठी प्रार्थना केल्याबद्दल धन्यवाद. हा एक दिव्य अनुभव होता.’ अशा आशयाची कॉमेंट किर्तीने या फोटोवर केली आहे. सुशांत मृत्यू प्रकरणाच्या पार्श्वभूमीवर किर्तीची ही पोस्ट सध्या सोशल मीडियावर सर्वांचेच लक्ष वेधून घेत आहे.
अभिनेता सुशांत सिंह राजपूत मृत्यूप्रकरणी रोज नवनवीन खुलासे होताना दिसत आहेत. अभिनेत्री रिया चक्रवर्तीविरोधात सुशांतच्या कुटुंबीयांनी अनेक आरोप केले आहेत. त्यामुळे दोन वेळा रियाची ईडीने चौकशी केली आहे. या चौकशीमध्ये अनेक गोष्टींचा उलगडा झाला असून तिचे फोन कॉल्स रेकॉर्ड देखील समोर आले आहेत. यात रियाने एयू नामक व्यक्तीला सर्वाधिक वेळा फोन केल्याचं आढळून आलं आहे. या प्रकरणी एयू हे नाव समोर आल्यावर सोशल मीडियावर अनेक चर्चांना उधाण आलं होतं. मात्र एयू ही रियाच्या जवळची व्यक्ती असल्याचं एका वृत्तात नमूद करण्यात आलं आहे.
रिया आणि एयू मध्ये ६३ फोन कॉल्स झाले. एयू ही रियाची फॅमेली फ्रेंड असून तिचं नाव अनन्या उधास आहे. परंतु, रिया आणि अनन्यामध्ये इतक्या वेळा फोन का झाले हे अद्याप स्पष्ट न झाल्याचं दिसून येत आहे. दरम्यान, रियाचे फोन कॉल्स रेकॉर्ड तपासल्यावर तिने महेश भट्ट यांनीदेखील फोन केले होते. तसंच तिने वडिलांना सर्वाधिक फोन केल्याचं पाहायला मिळालं.