​राजी या चित्रपटामुळे विकी कौशलचे हे स्वप्न झाले पूर्ण

विकी कौशलने लव्ह शव्ह ते चिकन खुराणा या चित्रपटापासून त्याच्या कारकिर्दीची सुरुवात केली. पहिल्याच चित्रपटातील त्याची भूमिका प्रेक्षकांना चांगलीच आवडली होती. त्यानंतर तो बॉम्बे व्हेलवेट, मसान, जुबान, रामण राघव २.० यांसारख्या चित्रपटांमध्ये झळकला. आता तो राजी या चित्रपटात एका महत्त्वाच्या भूमिकेत झळकणार आहे. राजी या चित्रपटामुळे विकीचे एक अनेक वर्षांपासूनचे स्वप्न पूर्ण झाले असे त्याने एका मुलाखतीत सांगितले आहे. राजी या चित्रपटाची निर्मिती करण जोहर करत आहे. करणने गेल्या काही वर्षांत बॉलिवूडला अनेक हिट चित्रपट दिले आहेत. आजच्या आघाडीच्या दिग्दर्शक-निर्मात्यांमध्ये त्याची गणना केली जाते. त्यामुळे अनेक नवोदित कलाकारांना करणसोबत काम करण्याची इच्छा असते. राजी या चित्रपटामुळे विकीची ही इच्छा पूर्ण झाली असल्याने तो चांगलाच खूश आहे. याविषयी एका मुलाखतीत विकीने सांगितले आहे की, करण जोहर यांच्यासोबत काम करण्याची माझी अनेक वर्षांपासून इच्छा होती. राजी या चित्रपटाच्या निमित्ताने माझे हे स्वप्न पूर्ण झाले. करण हा महान निर्माता असून त्याच्यासोबत काम करण्याची इच्छा प्रत्येक नवोदित कलाकाराची असते. त्यांच्यासारख्या निर्मात्याने मला चित्रपटात एका महत्त्वाच्या भूमिकेत घेणे हे माझ्यासाठी खूप महत्त्वाचे होते. राजीसारख्या चांगल्या चित्रपटात काम केल्यामुळे कलाकारामधील आत्मविश्वास देखील प्रचंड वाढतो. राजी या चित्रपटात विक्की एका पाकिस्तानी तरुणाची भूमिका साकारणार आहे. राजी हा चित्रपट ११ मे ला प्रदर्शित होणार असून या चित्रपटात आलिया भट्ट मुख्य भूमिका साकारणार आहे. आलिया या चित्रपटात एका गुप्तहेराची भूमिका साकारणार असून १९७१ मध्ये झालेल्या भारत-पाकिस्तान युद्धात गुप्तहेर म्हणून तिला पाकिस्तानमध्ये पाठवण्यात येते. या चित्रपटाचे लेखन हरिंदर सिक्का असून त्यांच्या एका कादंबरीवर आधारित या चित्रपटाची कथा आहे. या चित्रपटात आलिया तिची आई सोनी राजदान सोबत पहिल्यांदाच काम करताना दिसणार आहे. या चित्रपटाचे दिग्दर्शन मेघना गुलजार करणार असून मेघनाच्या याआधीच्या चित्रपटांना देखील प्रेक्षकांनी डोक्यावर घेतले आहे. Also Read : 'कलंक'नंतर म्युझिकल चित्रपटात दिसणार आलिया भट्ट...