Godfather Trailer: तेलगु सुपरस्टार चिरंजीवीच्या ( Chiranjeevi ) ‘गॉडफादर’ ( Godfather) या चित्रपटाची सध्या जोरदार चर्चा आहे. या चित्रपटाकडे सलमान भाईचे (Salman Khan) चाहतेही डोळे लावून बसले आहेत. कारण चित्रपटात सलमान खानही महत्त्वाची भूमिका आहे. चिरंजीवी व सलमान यांच्यावर चित्रीत ‘थार मार’ हे नुकतंच रिलीज झालेलं गाणं तुम्ही पाहिलं असेलच. आता ‘गॉडफादर’चा ट्रेलर रिलीज झाला आहे. सध्या या ट्रेलरने सोशल मीडियावर धुमाकूळ घातला आहे.
‘गॉडफादर’मध्ये चिरंजीवी ब्रह्माच्या रोलमध्ये आहे. ब्रह्मा अतिशय लोकप्रिय आहे. पण त्याचे मित्र आहेत तसेच त्याचे शत्रूही आहेत. ब्रह्मा आपल्या शत्रूंना शह देण्याचा प्रयत्न करतो. अशात सलमान भाईची एन्ट्री होती. ब्रह्मा शत्रूंशी लढत असताना भाईजान त्याच्या मदतीला येतो. ट्रेलरमध्ये सलमान चिरंजीवीला बडे भैय्या म्हणतो. ट्रेलर जबरदस्त आहेत. एकापेक्षा एक धमाकेदार अ‍ॅक्शन सीन्स खिळवून ठेवतात. नयनतारा आणि सत्यदेव यांची झलकही ट्रेलरमध्ये पाहायला मिळते.
‘गॉडफादर’ हा चित्रपट येत्या ५ ऑक्टोबरला चित्रपटगृहात प्रदर्शित होणार आहे. तुम्हाला कदाचित ठाऊक नसेल पण ‘गॉडफादर’ हा ‘लूसिफर’ या मल्याळम सिनेमाचा तेलगू रिमेक आहे. लूसिफरमध्ये मोहनलाल लीड भूमिकेत होते. तर ‘गॉडफादर’ मध्ये चिरंजीवी लीड रोलमध्ये आहेत. मोहन राजा यांनी हा सिनेमा दिग्दर्शित केला आहे. चिरंजीवी व सलमान यांची खऱ्या आयुष्यात खूप चांगली मैत्री आहे. दोघंही फॅमिली फ्रेन्ड आहेत. ‘गॉडफादर’च्या शूटींगदरम्यान ही मैत्री आणखीच घट्ट झाली. चिरंजीवी मुंबईला आला की त्याचा मुक्काम सलमानकडे असतो. याच मैत्रीखातर सलमानने ‘गॉडफादर’साठी एकही पैसा घेतलेला नाही.
सलमानच्या वर्कफ्रंटबद्दल सांगायचं तर सध्या सलमान अनेक प्रोजेक्टमध्ये बिझी आहे. सर्वप्रथम एप्रिल 2023 मध्ये त्याचा ‘टायगर 3’ रिलीज होतोय. सलमानचा ‘किसी का भाई किसी की जान’ हा सिनेमाही येत्या काळात पे्रक्षकांना पाहायला मिळणार आहे. यानंतर अनीस बज्मीच्या ‘नो एंट्री में एंट्री’ या सिनेमाचं शूटींग तो सुरू करणार आहे. शाहरुख खानच्या ‘पठान’मध्ये कॅमिओ भूमिकेत दिसणार असल्याची चर्चा आहे. याशिवाय ‘बिग बॉस’चं होस्टिंग आहेच. येत्या आठड्यापासून बिग बॉसचा 16 वा सीझन सुरू होतोय आणि हा सीझन सलमान होस्ट करतोय.