Shah Rukh Khan Birthday: बॉलिवूडचा बादशाह, म्हणजेच शाहरुख खानचा (Shah Rukh Khan) आज वाढदिवस आहे. आज किंग खान 58 वर्षांचा झालाय, पण त्याचा फिटनेस पाहता त्याच्या वयाचा अंदाज लावणे कठीण आहे. वाढदिवसानिमित्त शाहरुख खानने 'मन्नत'च्या बाल्कनीत येऊन चाहत्यांची भेट घेतली.
शाहरुख वाढदिवसानिमित्त मुंबईच्या रस्त्यांवर ड्राईव्हसाठी गेला होता. यावेळी त्याचे चाहते मोठ्या संख्येने जमले होते. किंग खानची एक झलक पाहण्यासाठी चाहत्यानी शाहरुखच्या गाडीला समोरुन आणि मागून घेराव घालण्याचा प्रयत्न केला. पण, यावेळी या उत्साही चाहत्यांना पोलिसांनी लाठीचा प्रसाद दिला. हा व्हिडिओ सोशल मीडियावर व्हायरल होत आहे.
व्हायरल झालेल्या व्हिडिओमध्ये शाहरुख खानचा ताफा रस्त्यावरुन निघाल्याचे दिसत आहे, यावेळी रस्त्यावर उपस्थित असंख्य चाहते शाहरुखच्या ताफ्यासमोर येऊ लागतात. हे चाहते शाहरुखचे गाडी थांबवण्याचा प्रयत्न करत होते. यादरम्यान पोलिसांनी चाहत्यांवर लाठीचार्ज सुरू केला. पोलिसांची लाठी पडताच चाहते सैरावैरा धावू लागले.
किंग खानने चाहत्यांना फ्लाइंग किस दिलासोशल मीडियावर आणखी एक व्हिडिओ समोर आला आहे, ज्यामध्ये शाहरुख त्याच्या कारमधून बाहेर पडताना आणि त्याच्या चाहत्यांना नमस्कार करताना दिसत आहे. पांढरा टी-शर्ट आणि गॉगल घातलेला किंग खान त्याच्या चाहत्यांना फ्लाइंग किसही देतो.
'जवान' नेटफ्लिक्सवर रिलीज शाहरुख खानच्या वाढदिवसानिमित्त त्याचा 'जवान' चित्रपट नेटफ्लिक्सवर प्रदर्शित झाला आहे. याशिवाय त्याच्या आगामी 'डिंकी' चित्रपटाचा छोटा टीझरही रिलीज करण्यात आला आहे. Dunki या ख्रिसमसला जगभरातील थिएटरमध्ये प्रदर्शित होत आहे.