आशिकीमधील या अभिनेत्रीला ओळखणेही झाले कठीण, एका अपघाताने तिचे बदलले संपूर्ण आयुष्य

अनू आता कुठे आहे याविषयी आम्ही तुम्हाला सांगणार आहोत.

ठळक मुद्देया अपघातानंतर तिच्या भूतकाळातील अनेक गोष्टी आठवत नव्हत्या. तिला या सगळ्यातून बाहेर पडायला काही वर्षं लागली. आजारपणातून बाहेर आल्यानंतर तिने तिची सगळी संपत्ती दान केली आणि संन्यास घेतला. अनू बॉलिवूडच्या झगमगत्या दुनियेपासून अतिशय दूर बिहारमध्ये राहाते.

आशिकी हा चित्रपट नव्वदीच्या काळात चांगलाच गाजला होता. या चित्रपटातील सगळ्याच व्यक्तिरेखा प्रेक्षकांनी अक्षरशः डोक्यावर घेतल्या होत्या. या चित्रपटातील सगळीच गाणी हिट झाली होती. आज या चित्रपटाला अनेक वर्षं झाले असले तरी या चित्रपटाची लोकप्रियता आजदेखील कमी झालेली नाही. या चित्रपटाने राहुल रॉय आणि अनू अग्रवाल यांना एका दिवसांत स्टार बनवले होते. त्या काळातील तरुणांसाठी ते दोघे रोल मॉडेल होते.

आशिकी या चित्रपटाची नायिका अनू अग्रवाल त्याकाळात प्रचंड प्रसिद्ध झाली होती. तिला अनेक चित्रपटांच्या ऑफर्स येत होत्या. तिने किंग अंकल, अजब तमाशा यांसारख्या अनेक चित्रपटांमध्ये काम केले. पण गेल्या अनेक वर्षांपासून अनू मीडियापासून दूर आहेत. ही अनू आता कुठे आहे याविषयी आम्ही तुम्हाला सांगणार आहोत. आशिकी या चित्रपटानंतर अनूचे अनेक चित्रपट फ्लॉप झाले होते. आपले करियर रुळावर आणण्याचा ती प्रयत्न करत असतानाच 1999 मध्ये तिच्या गाडीला भीषण अपघात झाला.

या अपघातानंतर अनू 29 दिवस कोमात होती. तिला अनेक महिने मुंबईतील एका रुग्णायलात दाखल करण्यात आले होते. ती कोमातून बाहेर आली असली तरी या अपघातामुळे तिचे संपूर्ण आयुष्य बदलले होते. तिला या अपघातानंतर तिच्या भूतकाळातील अनेक गोष्टी आठवत नव्हत्या. तिला या सगळ्यातून बाहेर पडायला काही वर्षं लागली. आजारपणातून बाहेर आल्यानंतर तिने तिची सगळी संपत्ती दान केली आणि संन्यास घेतला. तिने 2015 मध्ये "Anusual- Memoir of a Girl who Came Back from the Dead" हे तिच्या आयुष्यावर पुस्तक लिहिले होते. त्यात तिने तिच्या बॉलिवूड करियरविषयी आणि तिच्या या अपघाताविषयी लिहिले होते. हे पुस्तक प्रचंड गाजले होते.

अनू सध्या बॉलिवूडच्या झगमगत्या दुनियेपासून अतिशय दूर बिहारमध्ये राहाते. तिथे ती योगा शिकवते. गेल्या काही वर्षांत अनूमध्ये इतका बदल झाला आहे की तिला आता ओळखणे देखील कठीण झाले आहे.