बॉलिवूडचा ग्रीक गॉड अर्थात हृतिक रोशन (Hrithik Roshan). हृतिकची वेगळी ओळख करून देण्याची नाही. डॅशिंग, हँडसम हृतिक बॉलिवूडचा जबरदस्त अ‍ॅक्शन स्टार म्हणून ओळखला जातो. त्याच्या डान्सवर तर चाहते अक्षरश: फिदा आहेत. आज हृतिकचा वाढदिवस (Hrithik Roshan Birthday). आज तो 48 वर्षांचा झाला. तसा प्रत्येक वाढदिवस हृतिकसाठी खास असतो. पण यंदाचा वाढदिवस आणखीच खास होता. होय, या वाढदिवसाला हृतिकच्या आयुष्यात एका नव्या सदस्याची एन्ट्री झाली. हे हृतिकने स्वत:लाच स्वत: दिलेले गिफ्ट म्हणू शकता. हृतिकने ‘मोगली’ला दत्तक घेतलं आहे. खुद्द त्याने एक व्हिडीओ शेअर करत ही माहिती दिली. शिवाय या नव्या सदस्याची ओळखही करून दिली. आता हा मोगली कोण, असा प्रश्न तुम्हाला पडला असेल. तर मोगली म्हणजे एक पपी.
व्हिडीओत मोगली दिसतो. हृतिक हळूच त्याच्या नाकावरून हात फिरवतो. जिममध्ये मोगली सर्वत्र फिरताना दिसतो. हृतिकला हे कुत्र्याचं पिल्लू एका कारखाली सापडलं आणि त्याने त्याला दत्तक घेतलं. यानंतर चाहते हृतिकवर कौतुकाचा वर्षाव करत आहेत.हृतिक लवकरच ‘विक्रम वेधा’ या सिनेमात दिसणार आहे. हा सिनेमा 30 सप्टेंबर 2022 रोजी रिलीज होणार आहे. यात हृतिकसोबत सैफ अली खान व राधिका आपटे लीड रोलमध्ये आहेत.
आईने लिहिली खास पोस्टहृतिकच्या वाढदिवशी त्याची आई पिंकी रोशन यांनी एक भावुक पोस्ट शेअर केली आहे. ‘आजच्या दिवशी एक तारा जन्मला. जो सर्वांचं आयुष्यात प्रकाश घेऊन आला. तो लोकांसाठीच जगतो. त्याचं मनं इतकं स्वच्छ आहे की, तो नेहमी लोकांना सत्याच्या मार्गावर चालण्याची प्रेरणा देतो. तो लाखोंची प्रेरणा आहे. लाखो लोक त्याच्यावर प्रेम करतात. ’