तरुणाईचा सळसळता उत्साह, आवडत्या कलाकारांना नजरेत साठवून ठेवण्यासाठी अधीर झालेली मने, मोबाईल 'क्लिक' करण्यासाठीची धडपड. अशातच 'यंगिस्तान'च्या गळ्यातील ताईत असलेले जॉन अब्राहम, वरुण धवन, जॅकलीन फर्नांडिस या तिघांची 'एन्ट्री' अन् वातावरणात जल्लोषाची चढलेली एक निराळीच 'झिंग'. जॉनचा 'डॅशिंग लूक', वरुणची 'रोमँटिक स्टाईल' आणि जॅकलीनची 'दिलखेचक अदा' यांच्यामुळे नागपूरकर अक्षरश: घायाळ झाले. जॉन अब्राहम, वरुण धवन व जॅकलीन फर्नांडिस यांच्याशी नागपूरकर तरुणाईला संवाद साधण्याचा योग 'लोकमत'ने घडवून आणला. 'ढिशूम' या आगामी हिंदी चित्रपटाच्या 'प्रमोशन'ची सुरुवात शुक्रवारी नागपूरपासून झाली हे विशेष.'ढिशूम' या चित्रपटाच्या 'प्रमोशन'साठी आलेल्या या कलाकारांनी काँग्रेसनगरातील धनवटे नॅशनल कॉलेजच्या मैदानावर नागपूरकरांसोबत खुल्या मंचावर संवाद साधला. नागपूरकरांशी मराठीत संवाद साधून खास मराठमोळ्या शैलीत तिघांनी 'डान्स'देखील केला व प्रत्येक कृतीतून उपस्थितांची मने जिंकून घेतली. यावेळी तरुण-तरुणींची 'हाऊसफुल्ल' गर्दी झाली होती.तत्पूर्वी, या तिघाही कलावंतांनी 'लोकमत' वृत्तपत्रसमूहाच्या 'एडिटोरियल बोर्ड'चे चेअरमन व राज्यसभा खासदार विजय दर्डा यांच्या 'यवतमाळ हाऊस' या निवासस्थानी भेट दिली. यावेळी त्यांनी तेथे नागपुरातील निमंत्रित मान्यवरांशी संवाद साधला. मान्यवरांमध्ये जिल्हाधिकारी सचिन कुर्वे, मनपा आयुक्त श्रावण हर्डीकर, डॉ.जय देशमुख यांच्यासह विविध मान्यवरांचा समावेश होता. सायंकाळी हॉटेल सेंटर पॉईंट येथे जॉन, वरुण व जॅकलीनने 'लोकमत नॉलेज फोरम'अंतर्गत चाहत्यांशी संवाद साधला. युवकांनी गच्च भरलेल्या सभागृहात तिघांची 'एन्ट्री' होताच एकच जल्लोष झाला. यावेळी 'लोकमत मीडिया प्रायव्हेट लिमिटेड'चे सहव्यवस्थापकीय संचालक ऋषी दर्डा यांनी त्यांची खुमासदार मुलाखत घेतली. यात ढिशूम चित्रपटातील भूमिकेबाबत सांगत असताना विविध गमतीजमती उलगडल्या. यावेळी युवकांनी अमली पदार्थांपासून दूर रहावे, असे त्यांनी आवाहन केले. 'लोकमत' वृत्तपत्रसमूहाच्या 'एडिटोरियल बोर्ड'चे चेअरमन व राज्यसभा खासदार विजय दर्डा, माजी मंत्री अनिल देशमुख, माजी मंत्री अनिस अहमद, महानगरपालिकेचे विरोधी पक्षनेते विकास ठाकरे आदी मान्यवर मोठय़ा संख्येने उपस्थित होते.'अँक्शन-थ्रिलर'वर आधारित असलेल्या 'ढिशूम' चित्रपटाचे दिग्दर्शन रोहित धवनने केले आहे. रोहित धवन हा प्रसिद्ध बॉलिवूड दिग्दर्शक डेव्हिड धवन यांचा मुलगा असून वरुण त्याचा भाऊ आहे. 'ढिशूम' या चित्रपटात अभिनेता जॉन अब्राहम, वरुण धवन आणि जॅकलीन फर्नांडिस यांनी भूमिका साकारल्या असून हा चित्रपट २९ जुलै २0१६ रोजी देशभरात प्रदर्शित होणार आहे.(प्रतिनिधी) 'झिंगाट' गाण्यावर मराठमोळ्य़ा पद्धतीने 'डान्स' करुन वरुण धवनने चाहत्यांची मने जिंकली. यावेळी जॉन अब्राहम व ज्ॉकलीन फर्नांडीस यांनीदेखील त्याला साथ दिली.जॅकलीन जॉनला उचलते तेव्हा..आपल्या पिळदार शरीरयष्टीसाठी प्रसिद्ध असलेल्या जॉन अब्राहमला उचलण्याचे आव्हान वरुण धवनने पूर्ण केले. त्याअगोदर जॅकलीन फर्नांडिसदेखील जॉनला उचलू शकते का असा प्रश्न त्याने चाहत्यांना केला. यावर जॅकलीनने खरोखरच जॉनला उचलून सर्वांना आश्‍चर्यचकित केले. धनवटे नॅशनल महाविद्यालयाच्या मैदानात उपस्थित चाहत्यांनी जॅकलीनला टाळ्यांच्या कडकडाटाने दाद दिली.क्षणचित्रे￭ चाहत्यांची 'हाऊसफुल्ल' गर्दी￭ 'स्टार्स'चे 'सेल्फी' प्रेम￭ तरुणाईशी मराठीत संवाद￭ मराठमोळ्या गाण्यावर 'झिंगाट डान्स' |