Bhool Bhulaiyaa 3 Teaser: २००७ साली ‘भूल भुलैय्या’ आला आणि तुफान गाजला. अक्षय कुमारची मुख्य भूमिका असलेला हा सिनेमा लोकांनी अक्षरश: डोक्यावर घेतला. पुढे १४ वर्षांनी याचा सीक्वल म्हणजेच ‘भूल भुलैय्या २’ रिलीज झाला. कार्तिक आर्यनची (Kartik Aaryan ) मुख्य भूमिका असलेला हा सिनेमाही सुपरडुपर हिट झाला. कोरोना महामारीच्या सावटाखाली या सिनेमानं छप्परफाड कमाई केली. आता या सिनेमाचा तिसरा पार्ट अर्थात ‘भूल भुलैय्या ३’ ( Bhool Bhulaiyaa 3) येतोय. होय, कार्तिक आर्यनने ‘भूल भुलैय्या ३’ची घोषणा करत, याचा टीझरही रिलीज केला आहे. ‘भूल भुलैय्या ३’चा टीझर बघताच चाहते क्रेझी झाले आहेत.
कार्तिकने रूहबाबाचा लुक शेअर केला आहे. टीझरची सुरूवात होते आणि मंजुलिकाच्या पायातील पैजणांचा आवाज येतो. बॅकग्राऊंडमध्ये दिसतो तोच दरवाजा, ज्यावर रूहबाबाने कुलूप लावलं होतं. टीझर पुढे सरकतो तसा रूह बाबा बनलेल्या कार्तिकचा आवाज ऐकू येतो.
“आपको क्या लगा था कहानी खत्म हो गई? दरवाजे तो बंद होते ही इसलिए हैं, ताकि फिर दोबारा खुल सकें...,”असं रूहबाबा म्हणतो. यानंतर या चित्रपटातील ‘आमी जे तोमार’ हे गाणं वाजायला लागतं आणि रुह बाबाची झलक पहायला मिळते. रुह बाबा म्हणतो, “मैं आत्माओं से सिर्फ बात नहीं करता, आत्माएं मेरे अंदर आ भी जाती हैं...,” आणि हसायला लागतो.
‘भूल भुलैय्या ३’चा टीझर पाहून चाहत्यांची उत्सुकता शिगेला पोहोचली आहे. ‘भूल भुलैय्या २’मध्ये कार्तिक आर्यनसोबत कियारा अडवाणी आणि तब्बू मुख्य भूमिकेत होते. त्यांची केमिस्ट्री प्रेक्षकांना खूप आवडली होती.‘भूल भुलैय्या ३’ तब्बू व कियारा असणार का, हे मात्र अद्याप गुलदस्त्यात आहे. “दिवाली २०२४ ला रूह बाबा परत येतोय...,” असं टीझर शेअर करताना कार्तिकने लिहिलं आहे. म्हणजेच पुढील वर्षी दिवाळीच्या मुहूर्तावर हा सिनेमा प्रदर्शित होणार आहे. ‘भूल भुलैय्या २’ प्रमाणेच या चित्रपटाचं दिग्दर्शनही अनीस बज्मी करणार आहेत.