बॉलिवूडची परमसुंदरी अर्थात क्रिती सॅनन (Kriti Sanon) सध्या वेगळ्याच कारणानं चर्चेत आली आहे. क्रिती बॉलिवूडच्या सुंदर अभिनेत्रींपैकी एक. तिच्या सौंदर्यावर चाहते फिदा आहेत. क्रिती सॅनन ही बॉलिवूड इंडस्ट्रीतील एक उत्तम अभिनेत्री आहे. अलीकडेच ती 'आदिपुरुष'मध्ये 'जानकी'च्या भूमिकेत दिसली होती. क्रितीने आपल्या चाहत्यांसोबत सोशल मीडियाच्या माध्यामातून एक आनंदाची बातमी शेअर केली आहे.
क्रितीने तिच्या सोशल मीडिया अकाऊंट इन्स्टाग्रामवर एक व्हिडिओ शेअर केला आहे की आता ती एक निर्माती म्हणूनही तिच्या करिअरची सुरुवात करणार आहे. क्रितीने तिच्या प्रोडक्शन हाऊसचा टीझर शेअर केला आहे. अभिनेत्री म्हणाली की, नवी सुरुवात करण्यासाठी खूप उत्साहित आहे. व्हिडिओसोबतच क्रितीने लिहिले की, गियर बदलण्याची वेळ आली आहे. या इंडस्ट्रीत मी नऊ वर्षांपासून माझे स्वप्न जगत आहे. मला चित्रपट निर्मितीचा प्रत्येक पैलू आवडतो.
क्रितीने पुढे लिहिले, आता काहीतरी वेगळे करण्याची वेळ आली आहे. माझ्या आणि तुमच्या हृदयाला स्पर्श करणाऱ्या आणखी कथा सांगण्याची वेळ आली आहे, आशा आहे की तुम्हाला ते खूप आवडेल. 'ब्लू बटरफ्लाय फिल्म्स'ची सुरुवात करण्यासाठी खू उत्सुक आहे.''
क्रिती आता अभिनेत्री-चित्रपट निर्माती झाली आहे. 'ब्लू बटरफ्लाय फिल्म्स' असे तिच्या प्रोडक्शन हाऊसचे नाव आहे. अभिनेत्रीच्या या पोस्टवर अनेक सेलिब्रिटींसह चाहते प्रेमाचा वर्षाव करत आहेत आणि तिला शुभेच्छा देत आहेत. अभिनेत्री हुमा कुरेशी, अभिनेता वरुण धवनने क्रितीचे अभिनंदन केलं आहे.
क्रितीच्या वर्कफ्रंटबाबत बोलायचे झाले तर, लवकरच ती अभिनेता शाहिद कपूरसोबत नव्या चित्रपटात दिसणार आहे. सध्या तरी या चित्रपटाचे नाव जाहीर करण्यात आलेले नाही. यासोबतच अभिनेत्री राजकुमार रावसोबत 'भेडिया 2', 'गणपत: पार्ट वन' आणि 'सेकंड इनिंग'मध्ये दिसणार आहे.