बॉलिवूडमधील एव्हरग्रीन चित्रपटांपैकी एक म्हणजे 'हम साथ साथ है'. १९९९ साली प्रदर्शित झालेला हा चित्रपट आजच्या काळातही प्रेक्षकांच्या हदयाचा ठाव घेतो. या चित्रपटातील गाणीही लोकप्रिय ठरली होती. आजही अनेक कार्यक्रमात 'हम साथ साथ है'मधील गाणी वाजवली जातात. सलमान खान, सैफ अली खान, करिश्मा कपूर, सोनाली बेंद्रे, तबू, मोहसिन बहल मुख्य भूमिकेत असलेल्या या चित्रपटाची माधुरी दीक्षितलाही ऑफर होती. पण धक धक गर्लने या चित्रपटाला नकार दिला होता.
'हम आपके है कौन'मध्ये माधुरी आणि सलमान यांनी एकत्र काम केलं होतं. त्यांची जोडी प्रेक्षकांच्याही पसंतीस पडली होती. त्यामुळे चित्रपटाचे दिग्दर्शक सूरज बडजात्या यांनी माधुरीला हम साथ साथ है साठी विचारलं होतं. या चित्रपटातील तबूने साकारलेल्या साधना या भूमिकेची माधुरीला ऑफर होती. पण, ही भूमिका साकारण्यासाठी माधुरीने स्पष्ट नकार दिला होता. एका मुलाखतीत माधुरीने 'हम साथ साथ है' चित्रपट नाकारण्याचं कारण सांगितलं होतं.
सलमान खानमुळे 'हम साथ साथ है' चित्रपटाला नकार दिल्याचा खुलासा माधुरीने केला होता. "'हम आपके है कौन'मध्ये सलमानच्या प्रेयसीची भूमिका साकारल्यानंतर त्याच्या वहिनीची भूमिका साकारणं कठीण होतं. प्रेक्षकांना ही गोष्ट खटकली असती. चित्रपटात सलमान तब्बूच्या पाया पडून आशीर्वाद घेतो. तिला मिठी मारतो. यासाठी दीर-भावजय यांच्या नात्याचं फिलिंग येणं गरजेचं होतं. स्क्रीनवर सलमान माझ्या पाया पडताना दिसला असता, तर ते विचित्र वाटलं असतं. कारण, 'हम आपके है कौन'मध्ये माझी आणि सलमानची लव्ह स्टोरी होती," असं माधुरी म्हणाली होती.