बॉलिवूड स्टार मनोज वाजपेयी (Manoj Bajpayee) आणि साऊथ सुपरस्टार सामंथा अक्किनेनी (Samantha Akkineni) यांच्या अभिनयाने सजलेली ‘द फॅमिली मॅन 2’ (The Family Man 2) ही वेबसीरिज गत 4 जूनला रिलीज झाली आणि या सीरिजवर प्रेक्षकांच्या उड्या पडल्यात. आता काय तर या सीरिजने एका खास विक्रमावर नाव कोरले आहे. होय, ‘द फॅमिली मॅन 2’ जगातील चौथी लोकप्रिय सीरिज बनली आहे.मनोज वाजपेयीने त्याच्या इन्स्टाग्राम अकाऊंटवर एक यादी शेअर केली आहे. यात तुम्ही पाहु शकता की, ‘द फॅमिली मॅन 2’ला आयएमडीबी रेटींगमध्ये चौथे स्थान मिळाले आहे. (The Family Man 2 IMDB Rating)
सीरीजला आयएमडीबीवर 10 पैकी 8.8 स्टार देण्यात आले आहेत. या रेटिंगसह, ‘द फॅमिली मॅन 2’ला जगातील 5 सर्वोत्तम वेब सीरीजच्या यादीत जागा मिळाली आहे. अव्वलस्थानी ‘लोकी’ ही वेबसीरिज आहे. दुस-या क्रमांकावर ‘स्वीट टूथ’ आणि तिस-या स्थानी ‘मिअर ऑफ ईस्टटाऊन’ या सीरिज आहेत.आयएमडीबी रेटींगवरून ‘द फॅमिली मॅन 2’ने लोकांच्या मनावर किती मोठी जादू केली, याचा अंदाज तुम्हाला आला असेलच.
‘फ्रेंड्स’लाही पछाडले
‘द फॅमिली मॅन 2’ने ब-याच लोकप्रिय सीरीजना मागे टाकले आहे. फ्रेंड्स, ग्रेज अनोटोमी यासारख्या लोकप्रिय व बहुचर्चित सीरिजला ‘द फॅमिली मॅन 2’ने पछाडले आहे. ‘द फॅमिली मॅन 2’चा पहिला सीझनही असाच गाजला होता. पहिल्या सीझननंतर कधी एकदा सीरिजचा दुसरा सीझन येतो, याकडे चाहत्यांचे लक्ष लागले होते. ‘द फॅमिली मॅन 2’मध्ये मनोज वाजपेयीने श्रीकांत तिवारीची भूमिका साकारली आहे. तर सामंथा अक्कीनेनीने राजी हे पात्र जिवंत केले आहे. शारिब हाशमी, नीरज माधव, पवन चोप्रा, प्रियामणी, शरद केळकर, दर्शन कुमार यांच्याही यात महत्त्वपूर्ण भूमिका आहेत. आता चर्चा खरी मानाल तर या सीरिजच्या तिस-या सीझनची तयारी सुरू झाली आहे. अर्थात निर्मात्यांनी अद्याप तिस-या सीझनची कोणतीही अधिकृत घोषणा केलेली नाही.