बॉलिवूडचा हा स्टारसुद्धा करणार मराठी सिनेमात एंट्री!

आपलं स्मित हास्य, आपल्या अदा, नृत्य आणि सगळ्यात महत्त्वाचं म्हणजे अभिनयातील जादू यामुळे मराठीच नाही तर कोट्यवधी रसिकांच्या गळ्यातील ताईत बनलेली, बॉलीवुडची धकधक गर्ल, मोहिनी अशी कितीतरी नावं कमी पडतील अशी अभिनेत्री म्हणजे माधुरी दीक्षित नेने. माधुरीने गेली दोन दशकांहून अधिक काळ रसिकांच्या मनावर अधिराज्य गाजवलं. मात्र आजही माधुरीला लक्षात घेऊन सिनेमाच्या कथा लिहल्या जातात.असं असलं तरी आपली मराठी मुलगी मराठी सिनेमात कधी झळकणार असा प्रश्न सगळ्याच रसिकांना सतावत होता.कधी तरी माधुरीने मराठी सिनेमात काम करावं अशी रसिकांची इच्छा आहे.आता रसिकांची हिच इच्छा पूर्ण होत आहे.'बकेटलिस्ट' या मराठी सिनेमातून माधुरी मराठी रुपेरी पडद्यावर झळकणार आहे. इतकंच नाही तर माधुरी या मराठी सिनेमाची निर्मितीही करणार आहे. या सिनेमात मराठी कलाकारांची तगडी फौज पाहायला मिळणार आहे.याशिवाय मराठी रसिकांसाठी आणखी एक मोठं सरप्राईज या सिनेमात आहे.बॉलिवूडचा स्टार अभिनेता रणबीर कपूरसुद्धा या सिनेमातून मराठी रुपेरी पडद्यावर एंट्री मारणार आहे.या सिनेमात रणबीर मुख्य भूमिकेत झळकणार नसला तरी त्याची पाहुणा कलाकार म्हणून असलेल्या छोट्याशा भूमिकेचीही रसिकांना प्रतीक्षा असेल.यानिमित्ताने पुन्हा एकदा माधुरी आणि रणबीर एकत्र रुपेरी पडद्यावर पाहायला मिळतील. याआधी ‘ये जवानी है दिवानी’ या सिनेमातील घागरा गाण्यातही माधुरी-रणबीरची केमिस्ट्री रसिकांनी अनुभवली आहे.या सिनेमातील रणबीरचा सहभाग असलेल्या पार्टचं शूटिंग सुरुवातीलाच करण्यात आल्याची माहिती सूत्रांकडून मिळाली आहे.या सिनेमासाठी रणबीरला विचारणा करण्यात आली तेव्हा त्यानं यासाठी तात्काळ होकार दिला.‘बकेट लिस्ट’ हा जरी मराठी सिनेमा असला तरीही त्याच्याशी बॉलिवूडची अनेक मंडळी जोडली जात आहेत. यांत निर्माता- दिग्दर्शक करण जोहर याच्या धर्मा प्रॉडक्शनचाही समावेश आहे. माधुरीचा चित्रपट कधी प्रदर्शित होणार याची उत्सुकता आता तिच्या फॅन्सना लागली आहे. तिच्या चाहत्यांसाटी एक खूप चांगली बातमी आहे. कारण बकेट लिस्ट या चित्रपटाच्या प्रदर्शनाच्या तारखेची घोषणा नुकतीच सोशल मीडियाच्या माध्यमातून करण्यात आली आहे आणि या घोषणेसोबतच माधुरीच्या चाहत्यांना आणखी एक गुड न्यूज मिळाली आहे. ती म्हणजे निर्माता- दिग्दर्शक करण जोहर आणि त्याच्या धर्मा प्रॉडक्शन या निर्मिती संस्थेने मराठी चित्रपटसृष्टीत उडी घेतली असून माधुरी दीक्षितच्या आगामी बकेट लिस्ट या चित्रपटासोबत करणच्या धर्मा प्रॉडक्शन्सचे नावही जोडले गेले आहे. हा चित्रपट २५ मे ला प्रदर्शित होणार आहे.माधुरी दीक्षितने ट्वीट करत याविषयी तिच्या चाहत्यांना सांगितले आहे. तिने या चित्रपटाचे एक नवे पोस्टर पोस्ट केले असून यामध्ये माधुरी आपल्याला बाईक चालवताना दिसत आहे.करण जोहरने देखील मराठीत ट्वीट करत बकेट लिस्ट या चित्रपटाबाबत सांगितले आहे. त्याने ट्वीटमध्ये माधुरीला टॅग करत आपण दोघही पूर्ण करुया आपली BucketList असे लिहिले आहे.