टीव्हीची आघाडीची अभिनेत्री मौनी रॉय लवकरच अक्षय कुमारसोबत ‘गोल्ड’ चित्रपटात दिसणार आहे. यापाठोपाठ आलिया भट्ट आणि रणबीर कपूर यांच्यासोबत ‘ब्रह्मास्त्र’मध्ये तिची वर्णी लागलीये. याशिवाय जॉन अब्राहमसोबत ‘रोमियो अकबर वॉल्टर’ हा चित्रपटही तिच्या झोळीत पडला आहे. पण ही यादी इथेच संपत नाही तर आता एक चौथा चित्रपटही मौनीला मिळाल्याची खबर आहे. होय, या चित्रपटाचे नाव आहे, ‘मेड इन चायना’. या चित्रपटात मौनी राजकुमार रावसोबत आॅनस्क्रीन रोमान्स करताना दिसणार आहे. राजकुमारच्या पत्नीच्या भूमिकेत ती यात दिसेल. येत्या सप्टेंबरपासून मिखील मुसळे दिग्दर्शित आणि दिनेश विजन निर्मित या चित्रपटाचे शूटींग सुरू होत असल्याचे कळतेय.
मौनीने ‘क्योंकी साँस भी बहु थी’ या मालिकेपासून टीव्ही करिअरला सुरूवात केली होती.त्यानंतर ‘जरा नच के दिखा’मध्ये कंटेस्टंट म्हणून सहभागी झाली होती. ‘देवों के देव महादेव’, ‘बिग बॉस 8’अशा अनेक शोमधून मौनीने स्वत:ची छाप पाडली होती. त्या सगळ्या भूमिकांमुळेच आज मौनीला छोटा पडदा ते रूपेरी पडदा हा पल्ला गाठणे शक्य झाले आहे.