बॉलिवूडमधील प्रसिद्ध संगीतकार ए. आर. रेहमान यांनी आता निर्मिती क्षेत्रात पदार्पण केले असून त्यांची निर्मिती असलेला ‘९९ साँग्स’ हा चित्रपट लवकरच प्रेक्षकांच्या भेटीला येणार आहे. या चित्रपटातून अभिनेता इहान भट बॉलिवूडमध्ये पदार्पण करणार आहे. तो या चित्रपटात मुख्य भूमिकेत दिसणार आहे.
ए. आर. रेहमान यांनी आपल्या संगीताने रसिकांना भुरळ पाडल्यानंतर आता ते निर्मिती क्षेत्रात उतरले आहेत. त्यांनी ‘९९ साँग्स’ चित्रपटासाठी जीओ स्टुडिओसोबत हातमिळवणी केली आहे. ‘९९ साँग्स’ या चित्रपटात प्रेक्षकांना प्रेमकथा पहायला मिळणार आहे.
एका माध्यमाने दिलेल्या वृत्तानुसार, या चित्रपटात अभिनेत्री मनीषा कोईरालादेखील झळकणार आहे. या चित्रपटाचे दिग्दर्शन विश्वेश कृष्णमूर्ती करत आहेत. ए. आर. रेहमान यांनीच या चित्रपटाची कथा लिहिली आहे.
हा चित्रपट हिंदी, तमिळ आणि तेलुगू अशा तीन भाषांमध्ये प्रदर्शित होणार असून हा चित्रपट २१ जूनला प्रेक्षकांच्या भेटीला येणार आहे.