आमिर खानच्या ‘पगडी लुक’चा ‘ठग्स आॅफ हिंदोस्तान’शी नाही संबंध; सस्पेंंस कायम!

मिस्टर परफेक्टनीस अशी ओळख असलेल्या आमिर खान हा त्याच्या आगामी चित्रपटाअगोदरच प्रचंड चर्चेत असतो. लोकांना त्याच्या चित्रपटातील लुकविषयी अशी काही उत्सुकता असते की, ते स्वत:च याविषयी वेगवेगळे कयास लावायला सुरुवात करीत असतात. आता हेच बघा ना आमिर सध्या त्याच्या ‘ठग्स आॅफ हिंदोस्तान’ या चित्रपटाच्या शूटिंगमध्ये व्यस्त असून, चित्रपटातील त्याचा ‘पगडी लुक’ जबरदस्त पसंत केला जात आहे. सोशल मीडियावर तर त्याचे पगडी फोटो असे काही व्हायरल केले जात आहेत की, जणू काही लवकरच त्याचा हा सिनेमा रिलीज होईल. त्यामुळे फॅन्सचा हा वाढता उत्साह लक्षात घेऊन आमिरच्या टिमलाच पुढे यावे लागले. त्यांनी आमिरचा हा लुक ‘ठग्स आॅफ हिंदोस्तान’मध्ये नसेल असे आता स्पष्ट केले आहे. मात्र या चित्रपटात आमिरचा लुक कसा असेल याविषयी मात्र कुठल्याही प्रकारचा खुलासा केला नाही. गेल्या काही दिवसांपासून आमिरचा हा सरदारजी लुक सोशल मीडियावर व्हायरल होत आहे. त्यामुळे त्याच्या आगामी सिनेमात आमिरचा हा लुक असेल असे निश्चित समजले जात होते. पगडीत असलेला आमिरचा फोटो खूपच डॅशिंग दिसत असून, त्याच्या आगामी चित्रपटाच्या नावाला शोभणारा आहे. त्यामुळे त्याच्या फॅन्समध्ये या लुकविषयीची उत्सुकता दिवसागणिक वाढत असल्याचे समजल्यानंतर आमिरच्या टिमकडून याविषयीचा खुलासा करण्यात आला. आमिरच्या प्रवक्त्याने म्हटले की, सोशल मीडियावर फिरत असलेला आमिरचा पगडी लुक अन्य प्रोजेक्टसाठी आहे. ज्या सरदार लुकवरून चर्चा होत आहे, तो लुक एका स्पेशल प्रोजेक्टसाठी आहे. त्यामुळे या लुकचा त्याच्या ‘ठग्स आॅफ हिंदोस्तान’ या चित्रपटाशी काहीही संबंध नाही.  यश राज प्रोडक्शनच्या बॅनरखाली बनविण्यात येत असलेल्या ‘ठग्स आॅफ हिंदोस्तान’ या चित्रपटाच्या शूटिंगला आमिर मेमध्ये सुरुवात करणार आहे. त्यामुळे आता तो पगडी गेटअपमध्ये अन्य सिनेमावर काम करीत असावा, असा अंदाज वर्तविला जात आहे. गेल्यावर्षी रिलीज झालेल्या त्याच्या ‘दंगल’ या चित्रपटाने बॉक्स आॅफिसवर धूम उडवून दिली होती. त्यासाठी त्याने घेतलेली मेहनत स्पष्टपणे दिसतही होती. ‘दंगल’मध्ये दांडगा लुक असलेला आमिर ‘ठग्स आॅफ हिंदोस्तान’मध्ये सडपातळ बांध्यात दिसणार आहे. त्यामुळे त्याला या चित्रपटासाठीदेखील प्रचंड मेहनत घ्यावी लागेल यात शंका नाही. हा चित्रपट २०१८ मध्ये दिवाळीच्या पार्श्वभूमीवर रिलीज केला जाणार आहे.