आलिया भट आणि रणबीर कपूर यांच्या प्रेमकथेची सध्या चांगलीच चर्चा आहे. ते दोघे ब्रम्हास्त्र या चित्रपटाचे सध्या चित्रीकरण करत आहेत. या चित्रपटाच्या चित्रीकरणाच्या वेळी ते दोघे एकमेकांसोबत वेळ घालवत असल्याचे दिसून येत आहे. तसेच चित्रीकरण संपल्यावर देखील ते सतत एकत्र असल्याचे पाहायला मिळत आहे. आलिया आणि रणबीर लवकरच लग्न देखील करणार असल्याच्या बातम्या मीडियात नुकत्याच आल्या होत्या. पण तुम्हाला माहीत आहे का, आलिया भटच्या मोबाईलच्या वॉल पेपपरवर रणबीर कपूरचा नव्हे तर बॉलिवूडमधील एका प्रसिद्ध निर्मात्याचा फोटो आहे. हा निर्माता तिचा खूपच जवळचा मित्र असून त्याला ती तिचा मार्गदर्शक देखील मानते.
आलिया भटने स्टुडंट ऑफ द इयर या चित्रपटापासून तिच्या कारकिर्दीला सुरुवात केली. आज बॉलिवूडमधील प्रसिद्ध नायिकांमध्ये तिची गणना केली जाते. आलियाच्या पहिल्या चित्रपटात तिच्यासोबत आपल्याला वरुण धवन आणि सिद्धार्थ मल्होत्राला पाहायला मिळाले होते. या तिघांचाही हा पहिलाच चित्रपट होता. या चित्रपटाचा निर्माता करण जोहर असून करणनेच बॉलिवूडमध्ये आलियाला लाँच केले आहे. बॉलिवूडमध्ये पदार्पण करण्याआधी आलियाचे वजन खूपच जास्त होते. त्यामुळे तिने वजन कमी करावे असा सल्ला देखील करणने तिला दिला होता. पहिल्या चित्रपटापासूनच आलिया करणला आपला गुरू मानते.
झूम या वेबसाईटने काही दिवसांपूर्वी आलियाचे काही फोटो त्यांच्या साइटवर शेअर केले आहेत. या फोटोंमध्ये तिच्या मोबाईलचा वॉल पेपर दिसत असून त्या वॉलपेपरवर आलिया आणि तिचा गुरू करण जोहरचा फोटो असल्याचे त्यांनी म्हटले आहे.
करण जोहरला आलिया आपला खूप जवळचा मित्र मानते. बॉलिवूडमधील हा निर्माता तिच्या खूपच जवळचा आहे. त्याच्या घरातील कार्यक्रमांना, पार्टींना देखील ते आवर्जून उपस्थित असते. त्याची मुले यश आणि रुहीसोबत ती नेहमीच सोशल मीडियावर तिचे फोटो शेअर करत असते. तिच्या इन्स्टाग्रामवरील अकाऊंटवरील अनेक फोटोंमध्ये देखील आपल्याला करणला पाहायला मिळते.