Poster Releases : ‘व्हीआयपी-२’च्या पोस्टरमध्ये पहा काजोल, धनुषचा रुबाबदार लुक!

दाक्षिणात्य अभिनेता धनुष आणि अभिनेत्री काजोल यांच्या आगामी ‘व्हीआयपी-२’ या चित्रपटाचे पोस्टर नुकतेच रिलीज करण्यात आले असून, त्यामध्ये चित्रपटाच्या टीजर रिलीजविषयी सांगितले आहे. टीजरविषयी सांगण्याचे कारण म्हणजे यावर्षी रिलीज होणारे काही चित्रपट असे आहेत, ज्यांची चाहते आतुरतेने वाट पाहत आहेत. यामधीलच एक नाव ‘व्हीआयपी-२’ असल्याने पोस्टरनंतर आता टीजर रिलीजविषयी चाहत्यांमध्ये उत्सुकता लागली आहे. या चित्रपटात धनुष मुख्य भूमिकेत आहे, तर काजोलदेखील एक महत्त्वाची भूमिका साकारताना बघावयास मिळणार आहे.  दरम्यान, पोस्टरमध्ये काजोल सिंहासनावर बसलेली असून, धनुष तिची हुजरेगिरी तर करत नाही ना? असाच काहीसा भास होतो. या पोस्टरमध्ये आणखी एक महत्त्वाच्या गोष्टीचा उल्लेख केलेला आहे. तो म्हणजे या चित्रपटाचा टीजर आजच लॉँच केला जाणार असल्याचे सांगण्यात आले आहे. असो, या चित्रपटातून काजोल आणि धनुष पहिल्यांदाच स्क्रीन शेअर करताना बघावयास मिळणार आहेत. या चित्रपटाच्या माध्यमातून काजोल तब्बल १९ वर्षांनंतर तामीळ इंडस्ट्रीत कमबॅक करणार आहे. हा चित्रपट सौंदर्या रजनीकांत यांच्या दिग्दर्शनाखाली बनविण्यात आला आहे. हा चित्रपट २०१४ मध्ये रिलीज झालेल्या ‘व्हेलायिला पट्टधारी’ या चित्रपटाचा सीक्वल आहे. हा चित्रपट २८ जुलै रोजी रिलीज होणार आहे. याचदिवशी धनुषचा बर्थ डे असल्याने चित्रपट त्याच्यासाठी उत्कृष्ट गिफ्ट ठरण्याची शक्यता आहे. काही दिवसांपूर्वीच रजनीकांत या चित्रपटाच्या सेटवर पोहोचले होते. त्यावेळी सर्वांनीच रजनीकांत यांचे आशीर्वाद घेतले होते. काजोल या चित्रपटात काम करीत असल्याने रजनीकांत खूपच आनंदी आहेत. शिवाय काजोलचा पती अजय देवगणही या चित्रपटाची आतुरतेने वाट पाहत आहे.