हैदराबाद - दक्षिणेतील सुपरस्टार अलू अर्जुनचा पुष्पा द राईज चित्रपट सुपरडुपर हिट ठरल्यानंतर आता लवकरच या चित्रपटाचा दुसरा भाग पुष्पा २ येणार आहे. मात्र या चित्रपटाबाबत आता एक महत्त्वपूर्ण बातमी समोर आली आहे. सिनेसृष्टीत सुरू असलेल्या चर्चांनुसार पुष्पा २ च्या आयटम साँगमध्ये समंथा रुथ प्रभूच्या जागी बॉलिवूडमधील हॉट अभिनेत्री दिशा पटानीचे ठुमके दिसणार आहे. म्हणजेच समंथाला रिप्लेस करत दिशाने या चित्रपटामध्ये जागा मिळवली आहे.
दिग्दर्शक सुकुमार यांच्या दिग्दर्शनाखाली बनलेला आणि अल्लू अर्जुनचा अभिनय असलेला पुष्पा चित्रपट जबरदस्त गाजला होता. पुष्पाला हिंदी प्रेक्षकांकडूनही जोरदार प्रतिसाद मिळाला होता. पुष्पामधील गाणी आणि संवाद हिट झाले होते. पुष्पा द राइज चित्रपट १७ डिसेंबर २०२१ रोजी रिलिज झाला होता. या चित्रपटाने हिंदी भाषिक भागातही १०० कोटींचा व्यवसाय केला होता. या चित्रपटामधील ओ अंटवा या आयटम साँगमधून समंथा रुथ प्रभूने देशविदेशात जबरदस्त हवा केली होती. हे गाणे खूप चर्चेत होते. तसेच समंथा रुथ प्रभूच्या किलर मुव्ह प्रेक्षकांच्या पसंतीस उतरल्या होत्या. मात्र आता या चित्रपटाच्या सिक्वलमध्ये समंथाच्या जागी दिशा पटानी दिसणार आहे.
याबाबत येत असलेल्या रिपोर्टनुसार दिशा पटानीला दिग्दर्शकांनी पुष्पा द राइज चित्रपटासाठी विचारणा केली होती. ओ अंटवा या आयटम साँगमध्ये दिशाला घेण्यात येणार होते. मात्र काही कारणांमुळे दिशाने त्याला नकार दिला. मात्र आता निर्मात्यांनी तिला प्रस्ताव दिला तेव्हा तिने होकार दिला आहे.