केरळमध्ये पुरामुळे जनजीवन विस्कळीत झाले आहे़ राज्यातील बहुतांश जिल्ह्यांमध्ये पुराने हाहाकार माजला आहे़ किनारपट्टीलगतच्या भागातही पूरस्थितीने भीषण रूप धारण केले आहे. राज्यात आत्तापर्यंत पुराने १६७ बळी घेतले आहेत. पूरप्रभावित भागातील बचाव कार्याचे अनेक फोटो समोर येत आहेत. यातला एक फोटो लक्षवेधी ठरला आहे. होय,या फोटोत पुरात अडकलेल्या एका महिलेला सुरक्षित बाहेर काढले जात आहे. ही महिला दुसरी-तिसरी कुणी नसून मल्याळम चित्रपटसृष्टीतील सुपरस्टार पृथ्वीराज सुकुमारन याची आई आहे. बॉलिवूडच्या ‘अय्या’ या चित्रपटात पृथ्वीराज राणी मुखर्जीच्या अपोझिट दिसला होता. २०१२ मध्ये हा चित्रपट रिलीज झाला होता.