Ranveer Singh Deepika Padukone, ChotiDeepika: रणवीर सिंग आणि दीपिका पदुकोण हे बॉलिवूडचं एक रोमँटिक कपल आहे. रामलीला हा त्यांचा चित्रपट तुफान गाजला. रणवीर-दीपिकाचं प्रेमही याच चित्रपटाच्या सेटवर खुललं असं दोघांनी अनेक मुलाखतीत सांगितलं आहे. रणवीर सिंग सोशल मीडियावर खूप अँक्टिव्ह असतो. त्याची पत्नी दीपिका पदुकोण सध्या आगामी 'गेहराईयाँ' चित्रपटाच्या प्रमोशनमध्ये व्यस्त आहे. याच दरम्यान रणवीर सिंगने ट्विटरवर छोट्या दीपिकाचा शेअर केलेला एक व्हिडिओ चर्चेत आहे.
रणवीर सिंगने छोटी दीपिका असा उल्लेख करत एक व्हिडीओ शेअर केला आहे. त्या व्हिडीओमध्ये एक मुलगी 'राम लीला'मधील दीपिकाच्या लूकमध्ये दिसत आहे. व्हिडिओमध्ये या मुलीचा लूक आणि डायलॉग्स बोलण्याची अँक्टिंग खूपच झकास आहे. ही मुलगी फक्त छोट्या दीपिकासारखा लूक करून बसली आहे असं नाही, तर ती दीपिकाच्या आविर्भावात तिचे डायलॉग्सही लिपसिंक करताना दिसते आहे.
या व्हिडिओमध्ये दिसणारी छोट्या दीपिकाचं नाव आहे राशी शिंदे. या व्हिडिओमध्ये राशी दीपिकाच्या डायलॉगसोबत अवघड असा सीन करताना दिसत आहे. दीपिकाने ज्या खुबीने तो सीन वठवला होता, त्याच प्रकारे तीदेखील तो सीन करण्याचा प्रयत्न करतेय. लाल रंगाच्या राजस्थानी घागरा-चोलीमध्ये छोटी दीपिका चाहत्यांची मने जिंकत आहे. तसेच, छोटी दीपिका डायलॉगही छान बोलताना दिसत आहे. राशीचा हा व्हिडिओ ट्विटरवर शेअर करताना रणवीर सिंगने कॅप्शनमध्ये लिहिलं आहे, "लीलासारखी कोणीही नाही. दीपिका पदुकोण, तू तुझे मिनी व्हर्जन बघ. तिचे हावभाव बघ किती अप्रतिम आहेत #chotideepika."
#chotideepika सध्या ट्विटरवर ट्रेंडिंग आहे. हा व्हिडिओ पाहिल्यानंतर राशीच्या अनेक चाहत्यांनी तिचे कौतुक केले आहे. एका चाहत्याने लिहिलं की, धन्यवाद रणवीर. आमची राशी शिंदे ही मुलगी काहीतरी कल्पक गोष्ट करतेय आणि तू तिला स्टार बनवलंस. दुसर्‍या एका चाहत्याने लिहिलंय, रणवीरने पोस्ट केलेला व्हिडीओ पाहून खूप मस्त वाटलं. ही तर खरंच दीपिका पदुकोणची हुबेहुब कॉपी आहे. 'या मुलीने दीपिकाचे सर्वात कठीण पात्र खुबीने वठवले आहे. #chotideepika you are fabulous', अशीही कमेंट एकाने केली आहे.