गेली अनेक वर्षे हिंदी चित्रपटसृष्टीत आपला अभिनय, चिरतरुण सौंदर्य आणि मादक तसंच घायाळ करणा-या अदांमुळे रसिकांच्या काळजात अढळ स्थान मिळवलेल्या अभिनेत्री म्हणजे रेखा. त्यांच्या अभिनयावर आजही सारेच फिदा आहेत. त्यामुळेच की काय बॉलीवुड दिवा म्हणून त्यांची ओळख आहे.
रेखा- ऍन अनटोल्ड स्टोरी या पुस्तकात यासिर यांनी रेखा यांच्या खासगी जीवनाबाबत अनेक धक्कादायक खुलासे जगासमोर आणले आहेत. यापैकी एक खुलासा वाचून तुम्हालाही धक्का बसल्याशिवाय राहणार नाही. हिंदी चित्रपटसृष्टीतील अनेक सुपरस्टारसह स्क्रीन शेअर करणा-या रेखा यांच्या जीवनातील हे रहस्य कुणालाच माहिती नव्हतं. मात्र या पुस्तकाच्या निमित्ताने हे रहस्य जगासमोर आले आहे.
या पुस्तकातील संदर्भांनुसार रेखा यांना वयाच्या 16व्या वर्षी लैंगिक शोषणाचा सामना करावा लागला. 'अंजाना सफर' या सिनेमाच्या शुटिंगच्या वेळी हा प्रकार घडल्याचा दावा या पुस्तकातून करण्यात आला आहे. या सिनेमाच्या दिग्दर्शकानं रेखा फसवलं होतं. त्यांना न सांगताच रोमँटिक सीन दिग्दर्शकानं सिनेमात टाकला होता. सिनेमातील सीन बदलण्यात आल्याची रेखा यांना बिल्कुल कल्पनाही नव्हती. सीनच्या चित्रीकरणावेळी दिग्दर्शकाने ऍक्शन म्हणताच अभिनेता विश्वजीतने रेखा यांना आपल्या मिठीत घेतलं आणि त्यांना किस करण्यास सुरुवात केलं.
या सगळ्याची रेखा यांना बिल्कुल कल्पना देण्यात आली नसल्याने नेमकं काय सुरु आहे हे त्यांना कळलं नाही. हा किसिंग सीन जवळपास 5 मिनिटे सुरु होता. या किसिंग सीनमुळे रेखा यांना चक्कर आली आणि त्याचवेळी त्या बेशुद्धही पडल्याचे बोलले जाते. काही तरी वेगळंच सुरु असल्याचं मग रेखा यांना जाणवलं. त्यांनी स्वतःला विश्वजीत यांच्यापासून दूर करण्याचा प्रयत्न केला. मात्र विश्वजीत यांनी रेखा यांना सोडलं नाही. मात्र या सगळ्या प्रकारानंतर रेखा यांना समजलं की त्या लैंगिक शोषणाच्या बळी ठरल्या आहेत.
विशेष म्हणजे सिनेमाच्या शूटिंगदरम्यानच सिनेमा वादाच्या भोव-यात सापडला होता. प्रदर्शनावेळी सेन्सॉर बोर्डाकडे सिनेमा गेला तेव्हा. या एका सीनमुळेच प्रदर्शनाचा अडथळा निर्माण झाला होता. सिनेमातून किसिंग सीन काढून टाकण्यात यावा असे सेन्सॉर बोर्डाने सांगितले. या एका सीनमुळे सिनेमा प्रदर्शित होण्यासाठी दहा वर्ष वाट पाहावी लागली. १९६९मध्ये शूट केलेला हा सिनेमा १९७९ मध्ये 'दो शिकारी' नावाने प्रदर्शित करण्यात आला होता.