सध्या लॉकडाऊनमुळे बॉलिवूडमधील सेलिब्रेटी आपापल्या घरात असून सोशल मीडियाद्वारे आपल्या चाहत्यांशी संपर्क साधत आहेत. सलमान खान पनवेल येथील त्याच्या फार्म हाऊसमध्ये त्याच्या कुटुंबियांसोबत आहे. सलमान सध्या सोशल मीडियावर चांगलाच सक्रिय असून तो त्याच्या फार्म हाऊसमधील विविध फोटो, व्हिडिओ सोशल मीडियावर पोस्ट करत असतो.
सलमान सोशल मीडियावर विविध व्हिडिओ शेअर करत लोकांमध्ये कोरोना व्हायरसबाबत जागरुकता निर्माण करण्याचा प्रयत्न करत आहे. आता तर त्याने चक्क कोरोना व्हायरसवर एक गाणे बनवले असून हे गाणे नुकतेच सोशल मीडियावर शेअर केले आहे. त्याचा हा इन्स्टाग्रामचा व्हिडिओ केवळ पाच तासांत ११ लाखांहून अधिक लोकांनी पाहिला आहे. या पोस्टसोबत त्याने लिहिले आहे की, भावनात्मक रूपाने जवळ राहा, पण शारीरिकरित्या दूर राहा... सलमान खानच्या युट्यूब चॅनलवर लोकांना हे संपूर्ण गाणे पाहायला मिळत असून हे गाणे त्याच्या फॅन्सना प्रचंड आवडत आहे.
या गाण्याचे वैशिष्ट्यं म्हणजे हे गाणे सलमान खानने स्वतः गायले असून त्याच्या आवाजातील हे गाणे त्याच्या फॅन्सनचे मन जिंकत आहे. तसेच हे गाणे त्याने आणि हुसैन दलाल यांनी मिळून लिहिले आहे तर साजिद नाडियाडवालाने या गाण्याला संगीत दिले आहे. हे गाणे सलमानच्या पनवेलच्या फार्म हाऊसवर शूट केले असून या गाण्यात आपल्याला सलमानला पाहायला मिळत आहे.
जगभरात सध्या कोरोना व्हायरसने थैमान घातले असताना भारतातही या व्हायरसचा विळखा घट्ट होत आहे. दिवसागणिक भारतात कोरोना संक्रमित रुग्णांमध्ये मोठ्या प्रमाणात वाढ होत आहे. देशात सुरुवातीला २१ दिवसांचा लॉकडाऊन पंतप्रधान नरेंद्र मोदी यांनी जाहीर केला होता. आता तो वाढवून ३ मे पर्यंत करण्यात आला आहे. या दरम्यान सिनेमांचे शूटिंग आणि प्रमोशनही थांबवण्यात आले आहेत. एवढेच नव्हे तर भारतातील अनेक राज्यात मॉल्स, थिएटर बंद करण्यात आले आहेत.