केवळ मोदी आणि परमेश्वराचेच भक्त असू शकतात, असे तुम्ही मानत असाल तर ते चूक आहे. होय, कारण या यादीत भाईजान सलमान खानचेही नाव आहे. सलमान खान बॉलिवूडचा सुपरस्टार आहे आणि लाखो चाहते त्याच्यावर अगदी जीव ओवाळून टाकतात. सलमानचा चित्रपट आला रे आला की, चाहत्यांच्या त्यावर उड्या पडतात. लवकरच म्हणजे, येत्या बुधवारी सलमानचा ‘भारत’ हा सिनेमा प्रदर्शित होतोय आणि भाईजानचा चित्रपट येणार म्हटल्यावर चाहते पुन्हा एकदा ‘सैराट’ झाले आहेत. चाहते ‘भारत’ पाहण्यास किती उत्सुक आहेत, हे ट्वीटरवर असल्यास तुम्हाला कळेल. चाहते अगदी क्रेजी झाले आहेत. अनेक चाहत्यांनी ‘भारत’च्या रिलीजच्या पार्श्वभूमीवर अनेक क्रेजी व्हिडीओ शेअर केले आहेत.
गुवाहाटीच्या एका चाहत्याने आपल्या गाडीमागे ‘भारत’चे पोस्टर चिपकवले आहे. इंदोरच्या एका फॅन क्लबने ‘भारत’ पाहण्यासाठी एकाच वेळी २३५ तिकिटे बुक केलीत.
‘भारत’ या चित्रपटात सलमान वेगवेगळ्या पाच लूकमध्ये दिसणार आहे. अली अब्बास जफर दिग्दर्शित हा चित्रपट ‘ओड टू माय फादर’ या कोरियन चित्रपटाचा रिमेक आहे. या चित्रपटात सलमान पाच वेगवेगळ्या लूकमध्ये दिसणार आहे. भारत या चित्रपटात सलमान खान आणि कतरीना कैफसोबत जॅकी श्रॉफ, नोरा फतेही, सुनील ग्रोव्हर, तब्बू, दिशा पाटनी असे अनेक कलाकार आहेत. ईदच्या मुहूर्तावर ‘भारत’ प्रेक्षकांच्या भेटीला येणार असून हा सिनेमा हिंदीशिवाय, तमिळ, तेलगू आणि मल्याळम भाषेत रिलीज होणार आहे.