बॉलिवूडचा दबंग अभिनेता सलमान खानचे (Salman Khan) चाहते जगभरात आहेत. केवळ तरुणीच नाही तर अगदी लहान मुलं आणि वयोवृद्ध माणसंही त्याचे कौतुक करतात. 'मैने प्यार किया' पासून ते 'टायगर जिंदा है' (Tiger Zinda Hai) सारख्या आत्ताच्या सिनेमांमधून त्याने कायम प्रेक्षकांचं मनोरंजन केलं. सलमानही त्याच्या चाहत्यांचा आदर करतो आणि त्यांना जमेल तेव्हा शक्य तिथे वेळही देतो. असाच एक प्रत्यय एका व्हिडिओतून आला आहे. सलमानचा एअरपोर्टवरील एक व्हिडिओ सध्या व्हायरल होतोय ज्यामध्ये त्याच्या बॉडिगार्डच्याही जे लक्षात आलं नाही ते सलमानने हेरलं आहे.
सलमान खान नुकताच मुंबई एअरपोर्टवर दाखल झाला. त्याच्या भोवती सुरक्षाव्यवस्थेचा गराडा होता. गाडीतून उतरल्यावर तो विमानतळाच्या आत जाणार तेव्हा मध्येच तो थांबला. बॉडिगार्ड्सलाही कळलं नाही की काय झालं. तोच गर्दीतून एक छोटा मुलगा धावत सलमानकडे येत होता. सलमान खान लगेच त्या बाजूला वळला आणि थांबला. तो छोटा मुलगा धावत आला आणि त्याने सलमानला थेट मिठीच मारली.
सलमान खानची लहान मुलांमध्ये किती क्रेझ आहे हे पुन्हा एकदा दिसलं. सलमानही त्याच्या छोट्या चाहत्यांना निराश करत नाही मग तो किती जरी गडबडीत का असेना. 'बजरंगी भाईजान' सिनेमातून त्याने छोट्या मुलीसोबत अप्रतिम अभिनय करत चाहत्यांचं मन जिंकलं होतं. सलमानच्या कारकिर्दीतील उत्कृष्ट सिनेमांपैकी एक म्हणजे 'बजरंगी भाईजान' सिनेमा आहे.
सलमान खानचा नुकताच 'किसी का भाई किसी की जान' सिनेमा रिलीज झाला. बॉक्सऑफिसवर सिनेमा फारसा चालला नाही. आता त्याच्या 'टायगर 3' चित्रपटाची चाहत्यांना उत्सुकता आहे.