सध्या बॉलिवूडमध्ये री-रिलीज सिनेमांचा नवा ट्रेंड आला आहे. काही जुने सिनेमे पुन्हा थिएटरमध्ये रिलीज करण्यात येत आहेत. अशातच ९ वर्षांपूर्वी फ्लॉप झालेला एक सिनेमाही पुन्हा रिलीज करण्यात आला आहे. हा सिनेमा म्हणजे 'सनम तेरी कसम'. २०१६ साली प्रदर्शित झालेला हा सिनेमा फ्लॉप ठरला होता. मात्र या सिनेमातील लव्हस्टोरीने प्रेक्षकांची मनं जिंकली होती. आता रि-रीलिज झाल्यानंतर 'सनम तेरी कसम' सिनेमा बॉक्स ऑफिसवर राज्य करत आहे.
'सनम तेरी कसम' सिनेमा व्हॅलेंटाइन वीकच्या पहिल्या दिवशी म्हणजेच ७ फेब्रुवारीला थिएटरमध्ये पुन्हा प्रदर्शित करण्यात आला. चार दिवसांतच या सिनेमाने बॉक्स ऑफिसवर बंपर कमाई केली आहे. सॅकनिल्कने दिलेल्या रिपोर्टनुसार, 'सनम तेरी कसम'ने पहिल्या दिवशी ४.२५ कोटींचा गल्ला जमवला. तर शनिवारी ५.२५ कोटींची कमाई केली. रविवारी या सिनेमाने ६ कोटींचा गल्ला जमवला. तर चौथ्या दिवशी या सिनेमाने ३ कोटींची कमाई केली आहे. चारच दिवसांत 'सनम तेरी कसम'ने बॉक्स ऑफिसवर १८ कोटींचा बिजनेस केला आहे.
'सनम तेरी कसम' हिंदी सिनेमाच्या इतिहासात सर्वात लोकप्रिय अशी लव्हस्टोरी आहे. २०१६ साली आलेला हा रोमँटिक हिंदी सिनेमा आजही चाहत्यांच्या मनात घर करुन आहे. दरम्यान, 'सनम तेरी कसम' मध्ये हर्षवर्धन राणे आणि मावरा होकेनसह मनीष चौधरी, मुरली शर्मा, अनुराग सिन्हा, विजय राज, सुदेश बेरी, कमल आदिब हे अनुभवी या चित्रपटात महत्त्वाच्या भूमिकेत होते.